Кӱчыкэҥер… Мыняре лӱмлӧ еҥым шочыктен, кунар пӱртӱс поянлык дене ила тудо чапланен?! Тыште Михаил Янтемир, Совет Ушем Герой З.А.Краснов, гвардий полковник П.И.Курсов, поэт М.Казаков ден Юрий Исаков, Йошкар-Оласе 11-ше номеран лицейыште математикым туныктышо Т.И.Александрова, Эҥерсола школышто тӱҥалтыш класслам туныктышо Ю.П.Курсов шочын-кушкыныт. Писатель Геннадий Алексеев, семӱзгарым ыштыше П.П.Эчейкин Эҥерсола гыч улыт. Ты вершӧрыштак 1927 ийыште икымше сӱан ончыкталтын. Кӱчыкэҥер ялыште черкат лийын, но вара йӱлен. А кызыт изи часамла уло.
25 майыште Эҥерсола ден Кӱчыкэҥер кундем Морко районысо этнокультур предметлам туныктышо-влакым порын вашлие. Эҥерсола школышто марий йылмым туныктышо Э.В.Александрова самырык тукымым ятыр ий шинчымаш тӱня дене ончыко вӱда. Эльвира Васильевна виш урокым ончыктыш. Тудын урок деч ӧрдыжсӧ пашажым аклышна.
Вара ты кундемысе пӱртӱс поянлыкым куанен ончышна. М.Казаков лӱмеш тоштер вуйлатыше Г.К.Кутузова М.Казаков нерген веле огыл, а тысе лӱмлӧ еҥ-влакын пӱтынь илыш корныштым пала да кажныж нерген оҥайын каласкален кертеш. А тоштерын у пашаеҥже А.В.Архипов марий семӱзгар-влак дене палдарыш да шкежак тӱмырым пералтыш, шӱвыр дене шокталтыш.
Тоштер деч корно Ош купыш шуйналте. Тудын моторлыкшо кумылым савырыш. Икымше ойнат тыгайрак лие: «Вӱдшат ошыс!» А «Йошкар сер» курыкшо могае! Курык вуй гыч ончалат да Морко кундемыште тыгай пӱртӱс поянлык улмылан йывыртен колтет. Йошкар сер мучко Кӱчыкэҥер тӱвыра пӧртын вуйлатышыже И.В.Кутузова, художественный вуйлатышыже Э.А.Семёнова, арулыкым эскерыше Г.К.Николаева, «Муро сем» ансамбльын участницыже-влак В.А.Смирнова, А.К.Ширшова коштыктышт. Эмма Анатольевна ден Ирина Валерьевнан унам вашлийме муро мундырашт тунар поян! Кугу Шале тӱвыра пӧртын художественный вуйлатышыже да уста гармоньчо В.З.Кушаков Кӱчыкэҥер тӱвыра пӧрт дене пеш пеҥгыде кылым куча. А ваш келшен пашам ыштымаш чылаж годымат шонымашке шуаш полша.
Морко районышто этнокультур предметлам туныктышо-влакын методушем погынымашышт тыгай пайдалын эртымылан моткоч йывыртенам.
Елена Григорьева, Морко районысо марий йылме туныктышо-влакын методушем вуйлатышышт.
Снимкыште: Этнокультур предметлам туныктышо-влакын районысо методушем погынымашышт годым.
