2-6 июньышто Москошто Йошкар площадьыште лийше книга фестивальыш Марий Элысе писатель-влак миен толыныт.
Тушто Марий книга савыктыш пӧрт вуйлатышын сомылжым жаплан шуктышо Игорь Попов, Россий Писатель ушемым вуйлатыше Светлана Архипова да писатель, педагогике науко кандидат Анатолий Тулай (А.Ишалин) лийыныт.
Марий Элын павильонжо — 16-шо номеран. Тушто нуно ятыр книгам да марий сувенир-влакым ужаленыт.
Тыгак кум книган презентацийжым эртареныт. Анатолий Тулайын «Марийцы из далёкого прошлого», Кристина Архипован «Бардаклюши в поисках Деда Мороза» да пырля чумырымо «Белая лебёдушка» книга-влак нерген посна площадкыште каласкалыме.
«Тыгай фестиваль писатель-шамычлан путырак кӱлешан. Шкенан Марий книга савыктышынат, моло кундемысе савыктыш-шамычынат книгаштым, илышыштым да шуктымо пашаштым пален налат. Мыланем тыге миен толмаш кугу пайдам конден», — каласыш Анатолий Сергееевич Ишалин.
Фестивальыш 400 наре еҥ миен, тушто 700 наре мероприятий лийын.
А.Ишалинын фотожо-влак.