Йошкар-Олаште илыше да ятыр ий игечым эскерыше Геннадий Рыбаков рӱдолаштына шыжын могайрак койышан улмыж нерген радамла:
– Шыже нерген иктешлен каласаш гын, Йошкар-Олаште пытартыш 33 ийыште кокла шот дене 4,37 градус леве шоген, а тений 6,7 градусым ончыктен кертеш.
Пытартыш 45 ийым ончалаш гын, октябрьыште кокла шот дене 4,5 градус леве шоген, тений – 6,7 градус леве. Октябрьын кокымшо пелыштыже икымше пелыж деч 3,6 градуслан юалгырак лийын, тений – 4,2 градуслан. 2019, 2022, 2023 ийлаште поснак йӱр шуко йӱрын, тенийысе октябрьымат ты радамышке пуртыман.
Ты жапыштак ноябрьыште октябрь дене таҥастарымаште 7,5 градуслан юалгырак шоген, тений 5,9 градуслан юалгырак лийын кертеш. Ноябрь тӱҥалтыште кокла шот дене 0,5 градус йӱштӧ лийын гын, ноябрь мучаште – 5,6 градус йӱштӧ. А южо ийлаште температур чот вашталтын. Мутлан, 1995 ийыште 19 ноябрьыште 7 градус леве лийын, а 30 ноябрьыште – 26 градус йӱштӧ; 1998 ийыште – 2 ноябрьыште 4 градус леве, 21 ноябрьыште – 28 градус йӱштӧ, 2010 ийыште – 13 ноябрьыште 10 градус шокшо, 21 ноябрьыште – 14 градус йӱштӧ, 30 ноябрьыште – 24 градус йӱштӧ.
Тыгай фактым палемдаш лиеш: 1989 ий гыч 2024 ий марте ноябрьыште игече 2,8 градуслан левештен. Ӱмаште ноябрьын икымше пелыштыже кокымшо пелыж деч 0,4 градуслан йӱштырак лийын.
Весымат палемдаш лиеш: пытартыш 36 ийыште ноябрьыште телымсе гай йӱштӧ 1993 да 1998 ийлаште веле лийын, кокла шот дене 10,2 градус йӱштӧ шоген. Таҥастараш гын, пытартыш 40 ийыште телымсе кокла температур – 9,4 градус йӱштӧ.
Пытартыш 35 ийым ончалаш гын, октябрьыште да ноябрьыште левырак игече шоген гын, теле йӱштырак шоген. Ты жапыште йӱштӧ теле 1996, 2002, 2005, 2009, 2012, 2013, 2020, 2023 ийлаште палемдалтын, а 2019 да 2024 ийлаште леве лийын.
Шыжым лум луммо нерген ойлаш гын, эн ондак лум 50 ий ончыч, 1976 ий 8 октябрьыште чот лумын. А 1993 ий 25 октябрьыште да 1998 ий 15 ноябрьыште лум лумын да теле гочлан мландым леведын.
Пытартыш 46 ийыште октябрьыште икымше лум 11 ийыште гына лумын огыл, мутлан, 2007, 2008, 2021, 2013 ийлаште.
Ноябрьыште шагал лум лумын 1982, 1987, 1988, 1993, 1996, 2000, 2013, 2017, 2019 ийлаште. А теве 2002, 2006, 2007, 2010, 2011, 2014, 2016, 2021 ийлаште шуко лумын.
Пытартыш ийлаште лум эрелан возын: 2016 ийыште – 2 ноябрьыште,2022 ийыште – 15 ноябрьыште,2018, 2020, 2023, ийлаште – 20-23 ноябрьыште,2017 да 2021 ийлаште – 2-6 декабрьыште, а 2019 ийыште – 27 декабрьыште веле.