25 январьыште, Студент-влакын кечыштыже, Йошкар-Олаште Сеҥымашын ХХХ идалыкше лӱмеш тӱвыра полатыште КВН-ын студенческий фестивальже эртаралтын.
Тушто КВН-ын кубокшо верч (ссуз ден вуз-влак коклаште посна кубок) шым команде таҥасен.
Тиде таҥасымашыште, чынжымак, шокшо лийын. Икымше верыш ПГТУ-н «НВПМЧ» командыже лектын. Тыште вузын студентше ден выпускникше-влак улыт. Ты виян команде тений да 2022 ийыште Марий Элын чапшым Сочиште арален ыле.
МарГУ-н ончыкылык педагогшо-влакат ойыртемалтыныт да кокымшо верыш лектыныт. Кумшышто – Марий радиомеханический техникумын «Нефтяники» командыже. А нылымше вер ПГТУ-н «Хорошие новости» командыжлан логалын.
Тыгодымак «Эн оҥай мыскара» номинаций дене МОСИ ден Столичный бизнес колледжын «Телохроанитель» командышт палемдалтын. А эн сай номерлан Йошкар-Оласе аграрный колледжын агрономлан тунемше «На мосту» командыжын выступленийжым шотлымо.
Ынде кок арня гыч юниор-влакын КВН таҥасымашышт лийшаш.