«Тарватыдыме Россий» («Первозданная Россия») лӱман фотоончерым Т.Евсеев лӱмеш тоштерыште ончаш лиеш. Почмашым 8 июльлан палемдыме. Тыгай ончер кумшо гана почылтын.
Ончерыште Российысе (ир) пӱртӱсым 2020 ийыште камерыш возымо фотосӱрет-влак гоч ончыктат.
«Тарватыдыме Россий» — элын ик эн кугу фестивальже. 2014 ий гыч тудо экологий темым тарвата, пӱртӱсын моторлыкшым йӧратыше-влакым чумыра. Фотограф-натуралист-шамычын пашаштым ончыч Москошто, вара элнан моло олалаштышт, тыгак йотэллаште ончыктат — палемдат тоштер пашаеҥ-влак.
Марий кундемын рӱдолаштыже фотоончер 16 октябрь марте шуйна.