24 майыште Йошкар-Оласе школлаште тунемше-влак Колумб лудмаш сылнымут фестивальын оласе этапыштыже таҥасеныт. Конкурс йоча да самырык-влаклан В.Колумб лӱмеш республикысе книгагудышто эртаралтын.
Ӱдыр-рвезе-влак Валентин Колумбын почеламутшо-влакым рушла да марла лудыныт, тудын сылнымут саскажлан возымо мурым йоҥгалтареныт. Тылеч посна йоча-влак поэтлан пӧлеклалтше шке произведенийыштым каласкаленыт. Сылнымут вашлиймашке Марий Элын калык артисткыже Зоя Берникова, Марий тӱвыра рӱдер пеленысе «У муро» студий гыч бард мурызо-влак Геннадий Григорьев ден Геннадий Куклин толыныт, поэтын почеламутшылан возымо муро-влакым йоҥгалтареныт.
Йоча-влакын мастарлыкыштым аклаш куштылго огыл гынат, жюри эн тале участник-влакым палемден. 12 ияш деч изирак-влак коклаште 1 вер дене 7-ше №-ан гимназийыште тунемше Галкин Егор палемдалтын. 12-16 ияш-влак коклаште 13-шо №-ан школын тунемшыже Краснова Кристина сеҥышыш лектын, а 16 ияш деч кугурак-влак коклаште – И.С.Палантай лӱмеш тӱвыра да сымыктыш колледжын студентше – Алексеев Андрей. Сеҥыше-влак 9 июльышто Морко район Унчо селаште эртаралтше Колумб лудмашын республиканский конкурсыштыжо таҥасаш тӱҥалыт.
