Йошкар-Олаште — Колумб лудмаш

19 майыште Йошкар-Олаште «Колумб лудмаш» поэзий да муро усталык конкурс лиеш. Тудым Республикысе марий тӱвыра рӱдер, Йошкар-Оласе администраций эртарат.

Конкурс марий поэт-новатор Валентин Колумбын лӱмжым нумалше Йоча да самырык-влаклан книгагудышто лиеш, 11 шагатлан тӱҥалеш.

Таҥӱчашыш рӱдоласе школлаште, кыдалаш да кӱшыл профессионал туныктыш, ешартыш шинчымашым пуышо тӧнежлаште тунемше ден туныктышо, поэзийым да мурым йӧратыше да йоҥгалтарыше-влак ушнен кертыт.

Сылнымут номинацийыш ушнышо-влак В.Колумбын возымыжым да поэт нерген вес авторын возымыжым лудыт. Тыгак поэтын вес йылмыш кусарыме почеламутшо-влакым йоҥгалтарат. Вет уста марий поэтын возымыжым руш, эстон, финн да моло калыкын йылмыш кусарыме. Конкурсант-влак шке возымо произведенийыштымат сылнын лудын кертыт.

«Семлык» номинацийыште В.Колумбын почеламутшылан возымо муро-влакым, тыгак автор-шамычын мурыштымат мураш лиеш.

Сеҥыше-влак кеҥежым Морко районышто республик кӱкшытан конкурсышто шке мастарлыкыштым ончыктат.

Раисия Николаева.