Йошкар-Оласе пий-геройым саламлат

Фотом novayagazeta-ug.ru сайт гыч налме.

Йошкар-Оласе Комар лӱман немыч овчарке «Мыйын ласка да кӱлешан янлыкем» («Мой ласковый и нужный зверь») тӱнямбал премийын геройжо лийын. Интернет йӱклымаште тудлан 7394 йӱкым пуэныт.

Ушештарена, 2021 ийыште 19 октябрыште Марий Элысе МВД-н изирак инспектор-кинологшо Алексей Порфирьев да тудын Комар пийже ыштен шуктыдымо пӧрт гыч электроинструментым шолыштшо-влакым кычалыныт. Тыгодым пий кылмен кийыше самырык пӧръеҥым муын. Инспектор кийышылан икымше полышым пуэн. Тыге МВД пашаеҥын да Комар пийын полшымыштлан кӧра айдеме илыше кодын.

12 мартыште Калининград областьысе Зеленоградск олаште Тӱнямбал премийын лауреатше-влакым палемдаш тӱҥалыт.