Октябрь тӱҥалтыште Йошкар-Олаште Курчак театрыште Киров оласе Курчак театрын артистше-влак выступатленыт, а мемнан артистна-влак Юриныш да Козьмодемьянскыш миен коштыныт.
30 октябрьыште Марий Элысе Курчак театр да Чувашийысе кугыжаныш курчак театр сценышт дене алмашталтыт. Мемнан артистна-влак Чебоксарыште Алексей Толстойын йомакше почеш «Золотой ключик» спектакльым ончыктат.
А Чебоксар гыч толшо артист-влак Йошкар-Олаште «Петушок — золотой гребешок» спектакльым модыт. Тудым палыме руш калык йомак почеш шындыме. Пырыс ден Логын Агытаным чоя Рывыж деч эре утарен коштмышт нерген ойлалтеш. Но тиде эше чыла историй огыл. Томаша нерген ава шке ньогажлан йӱдлан каласкала. Тиде келшымаш да икте-весылан полшымаш нерген историй. Тудо, мутат уке, сайын мучашлалтеш да ньога ласкан мален кертеш.