Семёновко села деч вич меҥге тораште, Монага эҥер воктене верланен Якимсола. Индеш уреман кугу ял Йошкар-Олан кумдыкшылан шотлалтеш. Тыште 600 утла еҥ ила. Икшыве-влакым Семёновка селасе 21-ше номеран, В.С.Архипов лӱмеш да Медведево район Пурсанур школлашке автобус кондыштара. Кугыеҥ-влак шке транспортышт дене Йошкар-Олашке пашашке кудалыштыт.
Ял моткоч тура верыште верланен. Тудын йырже кумда пасу шарлен возын. Тушто тудо яра огеш кий, воктенысе колхоз кокияшым, икияшым ӱда. Ял деч тораште огыл Изи Какшан йоген эрта. Сандене тыште илыше еҥ-влак шукынжо колым кучаш кумылан улмышт нерген ойлышт. Тыгак тыште кундемнан эн тале, виян Кумыс фермыже пашам ышта. Якимсолаште кумдан чапланыше «Юность» йоча лагерь ятыр ий пашам ыштен. Тыште ик сменыште 300 утла йоча канен кертын. Чаманен каласыман, кызыт тудым петырыме. Кодшо оралте «тулык» еҥла шӱлыкан шинчылтеш. «Кидан-влак» мо сайжым мӧҥгышкышт нумалын пытареныт, кодшыжо верыштак эркын дене шӱэш. А вет тысе вер-шӧр йоча лагерьлан моткоч келшен толшо ыле.
Тыште ончыч виян да чапланыше «Овощевод» предприятий лийын. Шукынжо туштак пашам ыштеныт. Ялысе кум уремыште пӧрт-влакым «Овощевод» шке пашаеҥже-влаклан чоҥен коден. Садланак Якимсолаште ӧрдыж кундемла гыч толшо еҥ-шамыч шукын илат. Ятырынже пошкудо Киров кундем, У Торъял, Кужэҥер гыч тышке илаш куснен.
Якимсолаште яра шинчыше оралте укеат манаш лиеш. Шуко еҥ тыште шканже пӧртым налын илаш кумылан. Но пӧрт тыште шулдо акан огыл, вет ял олалан шотлалтеш. Якимсолам кум микрорайонлан шеледыме: Якимсола, Якимсола 1 да Якимсола 2. Кажне микрорайонлан старостам шогалтыме. Якимсолан старостыжлан Елена Николаевна Царегородцова шотлатеш. Ты тале ӱдырамаш ялын тӱзланымыже верч вуйын шога. Тидыжым тудын шуктымо сомылжо пеҥгыдемда. Ялыште вӱдлан насосым шогалтыман, корным ачалыман але моло сомылым шуктыман гын, тодо вуйлатыше декат йодышым рашемдаш лекташ ямде. Елена Николаевнан надыржылан кӧра Якимсола тӱҥалтыште йоча-влаклан у площадкым ыштыме. Тушто кызытсе илышлан келыштаралтше курыкым, лӱҥгалтышым да молымат вераҥдыме.
«Овощевод» деч ончыч ты ялыште тӱрыснек вес илыш лийын. Предприятий вияҥме дене тыште корным ачаленыт, у уремла-влакым чоҥеныт. Ялыште илыше-влак моткоч шуко вольыкым ашненыт. Тыге кеҥеж мучкылан ик гана веле кӱтӱм кӱташ черет логалын. Кызыт тыште у пӧртым чоҥышо-влакат шукын улыт. Боевой действийыште лийше участник-шамычлан мландым ойыреныт. Тыге Якимсолаште индешымше урем шочын. Мийымына годым ты уремыш газым шупшыт ыле. Шушаш жапыште тушто канде тул пӧртым ырыкташ тӱналеш.
Кугу яллан кок частный кевыт пашам, ФАП уло. Пашаеҥ укелан кӧра тушко арнялан кок гана кушкыжмын да изарнян Савинысе эмлымвер гыч фельдшер Мария Алексеевна Мельниченко коштеш. Тудын палдарымыж почеш, шукыж годым медпунктыш йочасадыш да школыш коштшо икшыве-влак тазалыкыштым тергаш коштыт. Тыгак кугыеҥ-влак давленийым висыкташ да моло йодыш дене толыт. Шоҥгыеҥ-влакым Савиныш автобус дене диспанцеризацийым эрташ кондыштарат. Якимсолаште илыше-влак моло специалист-шамыч дене тергалтнешт гын, Йошкар-Оласе 2-шо номеран поликлиникыш обратитлалтын кертыт.
Икмыняр ий ончыч Якимсолаште ял пайремым пайремленыт. Шукынжо толшо-влак улыт гынат, икоян да весела улмо шижалтын, мане Е.Царегородцева. У ийлан ялыште кажне ийын кожым шогалтеныт, но тений тӱрлӧ причинылан кӧра ты сомыл шукталтын огыл. Илыше-влак ты пайремлан шке пӧртыштым тӱрлӧ тӱсан гирлянде ден сӧрастарат. Кастене тыште чылт йомакыште улмыла чучеш!