Йошкар-Ола нерген оҥай факт-влак:
– Йошкар-Ола Озаҥ ола деч 150 меҥге, Моско деч 750 меҥге тораште верланен. Тыгак Воронеж марте 1000 меҥгым, Санкт-Петербург марте 1500 меҥгым, Симферополь марте 2000 меҥгым, Владивосток марте 8400 меҥгым шотлат.
– Йошкар-Олашке Моско гыч самолёт да поезд, Озаҥ гыч автобус да машина дене толаш лиеш.
– «Йошкин пырыс» олан шкешотан геройжылан шотлалтеш. Тудо ола рӱдысӧ ик теҥгылыште (МарГУ-н тӱҥ корпусшо воктене) шинчылтеш. Еҥ-влакын ойлымышт почеш, тудын пылышышкыже иктаж-могай шонымашым шып ойлет гын, шукталтеш.
– Оласе набережныйыште Амстердамын, Венецийын, Флоренцийын, Бельгийысе Брюгге ола-влакын шӱлышышт озалана. Тидыжо Российысе да совет жапысе архитектурлан у ямым пурта.
– Тӱп калык – марий. Научно-популярный «GEO» журналын шымлымыж почеш, Европышто марий-влак чимарий йӱлам кучышо пытартыш калыклан шотлалтыт.
– Йошкар-Ола деч тораштак огыл ятыр эҥер, ер, чодыра, пасу верланеныт. Пӱртӱсыштӧ лийнеда гын, автомашина дене кеч-могай верыш писын миен шуаш лиеш.
– Российыште «Й» буква гыч лач ик ола тӱҥалеш. Тиде Йошкар-Ола.
– Олаште шкешотан да оҥай памятник-влак верланеныт. Мутлан, Рембрандт Онегиным онча, Монакон принцше – загсым.
– Кече системысе 2910-ше номеран изи планетлан Йошкар-Олан лӱмжым пуымо. Тудым астроном Н.Черных 1980 ийыште Крымысе астрофизический обсерваторийыште почын.
– Йошкар-Ола Российысе моло ола деч шып улмыж дене ойыртемалтеш. Тыште ик ола тӱр гыч весыш 10-30 минут жапыште машина дене миен шуаш лиеш.