Йошкар-Ола – Зеленодольск кугорнын 33-40-ше меҥге коклаштыже асфальтым уэмдаш тӱҥалыт. Тудын кужытшо – 7,8 меҥге.
Тидын нерген Республикым вуйлатыше А.Евстифеев совещанийыште ойлен. Ты кугорно Силикатный посёлко гоч эрта. Тушто чӱчкыдын аварий лиеш. 2011-2013 ийлаште 33-шо меҥге марте кугорным тӧрленыт улмаш. 2014 ийыште умбакыже ачалыме пашам шукташ проектым ыштеныт. Ты проект почеш кугорно Силикатный посёлко йыр лийшаш улмаш, но паша верже гыч тарванен огыл.
Ынде ты корным 2021 ийлан «Дорожная сеть» федеральный проектыш пурташ шонат. Тыгай йодышым А.Евстифеев лишыл жапыште РФ правительствын председательжын алмаштышыже М.Хуснуллин дене каҥаша.