Йошкар-Ола гыч Питерыш – поезд дене

Фотом mk-mari.ru сайт гыч налме.

28 декабрьыште Йошкар-Ола гыч Санкт-Петербургыш Угарман гоч икымше поезд (ик купе да кок плацкарт вагон) каен.

Санкт-Петербург гыч Йошкар-Олаш вагон-влак Санкт-Петербург-Самара поездын составше дене 30 декабрь гыч кошташ тӱҥалыныт. Питерыш ик суткат пеле жапыште миен шуаш лиеш. Плацкартыш ик билетын акше – 3260 теҥге.

Вагон-влак Йошкар-Ола да Санкт-Петербург гыч кече коден лектыт. Арзамас, Угарман, Ярославль, Бологое да моло остановко улыт.

Чыла информацийым «РЖД Пассажирам» мобильный приложенийыште да кӱртньыгорно кассылаште пален налаш лиеш.

 

И.Александрова, Э.Терентьева.