6 августышто Йошкар-Оласе Чарла кремльыште «Йошка еш» регион-влак кокласе I гастрономический фестиваль эртаралтеш.
Тудо республикыштына ыштыме кочкыш нерген кумданрак почын пуаш полша. Фестивальыште Марий Эл да тыгак икмыняр регионышто кочкыш сату дене кылдалтше предприятий-влак, кафе, ресторан да мола участвоватлат. Мемнан кундемна марий калыкын кочкышыж дене палемда. Пайремыш толшо уна-влак команмелнам, подкогыльым, туаткалым, ӱячам, тӱрлӧ шыл дене ыштыме сийым тамлен кертыт.
Пайремыште шагат еда спонсор-влак деч тӱрлӧ пӧлек модылтыт. Тиде жапыштак кажне еҥ келшыше кочкышлан шке йӱкшым пуэн кертеш. А кастене сеҥышылан «Шӧртньӧ кӱмыж» премийым кучыктат.
Фестиваль уна-влакым ӧрыктараш ямде. Тиде кечын Чарла кремльыште Шернур сырзаводын «Мариджано» лӱман эн кугу сыр тыртышыжым ончыктат.
Каналташ толшо-влаклан ӱстембал модыш-влак, йоча-влаклан анимаций, капкылым тарватылме мероприятий, спорт таҥасымаш да молат лийыт.
Фестивальым Йошкар-Оласе «INMUSIC», «У еҥ» ансамбль-влак сӧрастарат. Кастене Моско гыч мурызо Карина Кокс сай кумылым пӧлекла.