«Кидпашам ыштен, чон кана, кумыл нӧлтеш», – ойлат ятыр кидмастар-влак. Морко район Нуж-Ключ школышто тӱҥалтыш класслам туныктышо, кызыт йоча дене декрет отпускышто шинчыше Екатерина Игнатьева тыгаяк шонымашан. Тудо изинек кидпашалан шӱмаҥ кушкын. Тидлан тудым аваже кумылаҥден.
Туныктышо лияш – пӱрымаш
Екатерина Нуж-Ключ ялыште шочын-кушкын, тысе школышто шинчымашым поген. Шочмо верыштыжак ешыж дене ила.
– Школ деч вара Йошкар-Оласе Марий радиомеханический техникумыш бухгалтерлан тунемаш пуренам. Вара Марий кугыжаныш университетыште руш йылмым да литературым туныктышылан тунемынам. Шочмо кундемыш пӧртылмеке, шке школыш тӱҥалтыш класслам туныктышылан ӱжыныт. Тидлан лӱмын курсым эртенам да изи ӱдыр-рвезе-шамыч дене пашам ышташ тӱҥалынам, – каласкала Екатерина Игнатьева.
Аваже кумылаҥден
Уста туныктышын кидпашаже-влак дене ты кундемыш командировко дене мийыме годым палыме лийынна. Тудын пашаже-шамычым школысо ик лукыш чумыреныт ыле. Тушто утларакшым йомакысе тӱрлӧ герой дене палдареныт. А нуныжо пуйто чылт илыше улыт! Шинчашт, кидышт, ӱпышт да капкылысе моло ужашышт, илыше герой гаяк. Тыгайым, чынжымак, шке пашаж дене йӱлышӧ мастар еҥ веле шочыктен кертеш.
– Авамын тӱрлӧ сӧрастарышым ыштымыжым изи годсек ончен кушкынам. Тудын пелен чӱчкыдын шинчылтынам, тыгак шӱмаҥынам. Авам тӱрлаш, пидаш, ургаш мастар лийын. Тыглай пижым але носким кевытыште налме гайым ыштен.
Мый утларакшым крючок дене пидам, тыгак бисер дене моторлыкым «шочыктем». Шукырак пашам мӧҥгыштӧ аралалтыт. Йодшо-шамычат улыт, утларакшым мочылам але иктаж сӧрастарышым ыштен пуаш йодыт, – ойла кидмастар.
Жапым налеш
Ончыч Екатерина модышым эскиз-влак почеш келыштарен гын, кызыт чылажымат кидшӱм почеш ышта. Тидлан шукертак тунемынам, манеш. Ойлымыж почеш, ик модышланак шагал огыл жап кӱлеш. Но мочыла да пушкыдо шӱртӧ пидме модыш-влакын техникышт ойыртемалтыт.
– Нигуш ойырлыде, кок кече ик модышым пидын шинчет гын, ты жапыште тудым ыштен пытараш лиеш. Но ялыште сомыл ятырак, садлан эре кидпаша дене веле от шинчылт. Тыгак модышын нелылыкше деч шуко мо шога. Янлыкын чурийжым, кид-йолжым да моло ужашыжымат моторын келыштарыман. Садлан утларак жапше тидлан кая, – палдара Екатерина.
Кеч-могай сомылым кумылын ыштыман, вара лектыш куандарыше лиеш, палемда Е.Игнатьева. Тений тудо вестӱрлӧ шӱртӧ гыч курчак-шамычым пидаш тунемын. Тидлан кидмастар журналлам шымла, видеоурок-влакым онча. Кидпашалан шӱртым да кӱлешан моло арверым маркетплейслаште наледа. Тидын шотышто нелылык уке, оксат вет лийже, манеш.
Чынжымак, шке кумылым эреак нӧлтен моштыман. Садлан кидпашам йӧратыше-шамычым тидын шотышто мокталтыман. Вет тачысе илышыште иктаж-мом ыштен от мошто гын, кеч-могай йӧнлан эҥертен тунемаш лиеш. Тӱҥжӧ – кумыл!
Авторын фотожо-влак.