Пӧртым нӧлташ шуко чытыш, вий-куат, мастарлык, келге шинчымаш кӱлыт. Тыгодым чертёжымат сайын лудын моштман веле огыл, паша лектышымат ончылгоч ужман. Тачысе лаштыкнан геройжо Параньга посёлкышто шочын-кушшо, Москошто ик чоҥымо организацийыште прораблан пашам ыштыше Владимир Тимофеев тидым моткоч сайын умыла, вет тудо йӧрытыме сомылжым ынде 19 ий кумылын шукта.
Кидлан мастар кушкын
Кугем шумеке, кӧ лийшашым рвезе школышто тунеммыж годымак пален. Чылажат технологий урок гыч тӱҥалын. А тушто рвезе-влакым могай гына кидпашалан туныктен огытыл! Владимирын тидлан кидшат сайын толын. Лач тышеч чоҥышо лияш кумыл лектын.
«Тунам мый 6-шо классыште тунемынам. Технологий урокышто пу гыч шкатулкым, пеледышым шындаш тумбым, кольмым да тулеч моло арверым ыштенна. Станок воктене шогылтынна. Ыштыме арверем-влак сайын лектыныт, вара ты пашалан эшеат чот кумылаҥынам – шомакшым тӱҥале Владимир – Тышеч мый пашазе профессийым ойырен нальым. Ачам милиций пашаеҥ лийын, авам – штукатур-маляр. Авамын пашажым эскераш йӧратенам. Очыни, туддечат шуко куснен», – ойлыш тудо.
Каменщик, сварщик…
Школ деч вара Параньга профтехучилищыште (кызыт строительно-технологический техникум) Владимир тыгай специльностьым налын. Сандене нине паша рвезылан палыме улыт. Икымше паша корно тудым Йӱдвел кундемышке наҥгаен.
«Тунем пытарымеке, Марий Элыште шотлан толшо пашам шым верешт. Опыт деч посна огыт нал. Йӱдвелыште кудальым, ик организацийыште ышташ тӱҥальым. Тунам мый 18 ияш лийынам. Варажым Марий кундемышке уэш пӧртыльым», – ола тудо.
Рвезе квалификацийым эре нӧлтен толын. Красноярск кундемыште сварщик, Озаҥыште каменщик разрядым налын.
Пашам тӱрлӧ вере ышташ логалын. Йошкар-Олаште «Мебель для вас» кевытыште грузчиклан, сатум колтышылан, «Звениговский» совхозышто сварщиклан тыршен.
Шуко окнан пӧрт
Вара чоҥымо пашалан кумылаҥын. Изирак бригадым погымеке, Москошко куснен. Тӱрлӧ верыште йодмо почеш пӧртым чоҥаш тӱҥалыныт. Варажым бригадыште чоҥышо-влакат эркын-эркын ешаралтыныт, объект-шамычат шукемыныт. 2007 ий гыч 2011 ий марте шке кӱшеш тыге пашам ыштен коштын гын, варажым бригадыжге Москосо ик чоҥымо организацийышке куснен.
В.Тимофеевын сомылжо шуко. Тудо у объект-влакым кычалеш, заказчик дене кылым пеҥгыдемда, бригадыж дене пырля тырша, ыштен шуктымым терга. Тыгайрак прорабын пашаже.
Ончыч блок, пырня дене пӧртым, мончам нӧлтеныт, южо пашаеҥже Москосо элитный пачерлаште отделке пашам ыштеныт. Кызыт ынде кок ий фахверк технологий почеш каркас пӧртым погаш тӱҥалыныт. Тидыже Европышто пӱтынек шыҥен пурен.
«Немыч технологий почеш ышталтеш. Тачысе кечын тыгай пӧртым шукын йодыт, тыгодым тудо моторлан шотлалтеш да вашке погалтеш. Тидын нерген ик палымем каласкален да ыштен ончаш темлен. Мутат уке, келшышым. Москошто кок арня жапыште нӧлтен шогалтышна. Тӱҥжӧ: чертёжым лудын моштыман, пӧрт могай лийшашым ончылгоч ужман. Тунам паша куштылгын кая.
Ты пӧртын шке ойыртемже уло: тудым огыт чоҥо, а посна клеитлыме пу брус дене погат, шуко окнан. Пӧрт тувыртыш гыч тӱҥалын, кӱвар марте яндан пырдыж лиеш. Тӱжвал сынже аквариумым ушештара, чылажат вошт коеш», – ойла Владимир.
Бригадыште 15 пашаеҥ ныл тӱрлӧ объектыште, тӱрлӧ олаште тырша. Тыгай пӧртым Москошто, Моско областьыште, Крымыште, Сочиште, Екатеринбургышто, Башкирийыште да моло вере ыштыме.
Ешге – Пошкырт кундемыште
Паша ситыше. Шочмо кундемышке толаш жапшат уке. Тыгодым ача-аважат илыш дене шукертак чеверласеныт. Сандене шочмо вершӧрышкыжӧ ынде куд ий толын огыл. Пошкыр вел ӱдырым Екатеринам вашлиймеке, 2014 ий гыч ты кундемыште ик ялыште илаш тӱҥалыныт. Ӱдыр ден эргышт кушкыт.
Владимир – ушан-шотан, шке пашам шот дене шуктышо, весела кумылан самырык пӧръеҥ. Туддене мутланымеке, илышыште ум кычалме, шке шонымашке шуаш тыршыме койышыжо шижалте. Тыгодым шке пашажым йӧратен шукта, шонымашыжат шуко.