Ялыште шочын-кушшо йоча изинек пашалан тунемеш. А шке сурт-печым кучет гын, сомыл нигунам ок пыте. Тидым Татьяна Филипповат сайын пала. Самырык ава пашаче веле огыл, кидпашаланат мастар. Тудо тӱрлӧ сынан мотор пушкыдо модыш-влакым крючок дене пидеш.
Паша деч ок лӱд
Татьяна – Параньга район Руш Лажмарий ялын шочшыжо, Элпанур ялын шешкыже. Аваже Валентина Григорьевна ӱдыржӧ-влакым (Татьянан кок йыгыр шӱжарже уло) арулыклан, пашалан изинек туныктен. Пашаш кайымышт годым ача-аваже Татьяналан кугурак икшыве семын эше кок шӱжаржым ӱшанен коденыт. Вольыкым ончаш, кочкаш шолташ, суртым арулыкышто кучаш, пакчаштат тыршаш логалын.
Ӱдыр Лажмарий тӱҥ школышто тунемын. Тудлан марий йылме ден технологий урок-влак утларак келшеныт. Школышто чолгалыкше дене ойыртемалтын, ятыр конкурс ден мероприятийыш ушнен, олимпиадыште шинчымашыжым терген.
– Изиэм годым врач лияш шоненам, садлан школ деч вара Йошкар-Оласе медицине колледжыш медшӱжарлан тунемаш пуренам. Дипломым налмеке, Йошкар-Оласе ик частный медрӱдерыште пашам ышташ тӱҥалынам. Пашаште тӱрлӧ еҥ дене вашлият, мутым вашталтет. Полышым йодын толшо-влакын кумылыштым ужын-шижат, тургыжланымышт годым поро мут дене лыпландарет. Адакшым чытышан лийман, вет торжан пелештышат шагалын огытыл, – ойла Т.Филиппова.
Урокышто тунемын
Кидпашалан Татьяна школыштак шӱмаҥын. Крючок дене пидаш технологий урокышто Г.Н.Ахметзянова туныктен. Урок годым мотор салфетке-влакым пидыныт. Тунам ӱдыр кевытысе гай сӧрал пушкыдо модыш-влакым шке пидаш лиеш манын шоналтенат огыл. Икымше тыгай кидпашам йоча дене шинчымыж годым ямдылен.
– Интернетыште крючок дене пидме модышын фотожым ужынам, эргымланат тыгайым ыштен пуаш кумылем лектын. Келшыше схемым ятыр жап кычалынам, видео-влакым ончен тунемынам. Тыге икымше пырысиге «шочын». Кызытсе пашам-влак дене таҥастараш гын, тудо пеш мотор да сайжак лектын огыл, южо вере оҥгыжат йомын кодын. Кокымшо модыш сӧралрак ыле, тылеч вара «азартыш пуренам», манаш лиеш, – палдара кидпашазе.
Лумъеҥ, йомакысе персонаж…
Кызыт гын ик модышым пидаш Татьяналан ик-кок кече гына кӱлеш. Тыгодым шӱртӧ тӱсым келыштарен моштыман, эше ятыр молымат шотыш налман. Садлан чытышат ситышаш манын палемда Т.Филиппова. Крючок ден шӱртым тудо шукыж годым кастене, чыла сомылым ворандарымеке, кучен шинчын. Тиде шкешотан антистресс. Ончыч икшывыжлан модашыже гына пидын пуэн, родыжо-влаклан пӧлеклен гын, кидпаша фото-влакым соцсетьыш вераҥдымеке, тыгайымак пидын пуаш йодшо-шамыч ятырак лектыныт.
Татьяна – кок шочшан ава. Йоча-шамыч мультфильмым але йомакым ончатат, келшыше геройым пидын пуаш йодыт.
– Эн кугу пидме модышем – 60 сантиметр наре кӱкшытан лумъеҥ. Эн ойыртемалтше пашалан парняш чийыме йомакысе персонаж-влакым шотлаш лиеш. Нуным оласе ик йочасадын йодмыж почеш ямдыленам. Эн моторлан могайым шотледа манын йодмылан вашмутым пуэн ом керт – кажне модыш шке семынже сӧрал, – ойла самырык ава.
Кызыт Т.Филиппова – кокымшо йоча дене декретыште. Кажне татым пайдалын эртара. Чоным лыпландарыше эше ик сомылжо – ӱдыр-влаклан шинчапуным кушташ. Тидлан ик моторлык салоныш тунемаш коштын. Икымше клиентше-влак аваже да кок шӱжарже лийыныт. А кызыт, опытым ситышын погымеке, туддек моторрак лияш шонен толшо-шамыч улыт.
Филипповмыт Йошкар-Олаште илат, каныш кечылан шочмо верыш кудалыт. Кок йочалан жапым да вийым ятырак ойыраш логалеш гынат, Татьяна йӧратыме пашажым ӧрдыжеш ок шӱкал. А кидпаша шотышто мастар кидан еҥын шонымашыже шуко. Кумыл уло, тугеже йӧн лектеш!
Т.Филиппован альбомжо гыч налме фото-влак.