26 июнь гыч 2 июль марте Тольятти олаште Российысе курчак театр-влакын «КукСъезд» фестивальышт эртаралтын.
Тушко Моско, Нижний Тагил, Брянск, Озаҥ, Набережный Челна, Ульяновск, Тула, Горловка, Владимир да Йошкар-Ола гыч курчак театрын артистше-влак ушненыт. Марий Эл гыч мийыше труппо режиссёр да художник Т.Батракован «Колыбельная» йомакшым ончыктен да 11 театр-влак коклаште «Эн сай спектакль» лӱмым сулен налын. Эксперт-влакын ойлымышт почеш, ты спектакльыште курчакым кугун пагалымым шижаш лиеш. Тыгак актёр Руслан Незеев ден Марий Элын калык артисткыже Эльвира Лисицынан дуэтышт пеш сайын ончалтеш маныныт.
