Морко район Шордӱр тӱвыра пӧртыштӧ У ий пайрем вашеш годым лум мӧчӧр-влакым келыштареныт.
«Тений тӱвыра пӧрт ончылно фигур-влакым ышташ лум шагал, сандене луммӧчӧр-влакым кагаз дене ышташ шонен пыштышна. Тыгодым кагаз яшлыкым кучылтынна», – каласыш тӱвыра пӧртым вуйлатыше Эльвира Максимова.
Тыгак кагаз дене тӱрлӧ тӱсан, форман снежинкым ыштылыныт. Ты пашам Кокласола школышто тунемше Настя Охотникова ден Шордӱр школын тунемшыже А.Коновалов шуктеныт.
Марий Турек посёлкышто, эртен кудалшыла, «Берёзка» йочасадыште ятыр лум фигурым ужым. Эн кугужо – идалыкын символжо Куголя – ыле. Ты паша нерген йочасадым вуйлатыше Анжела Виноградова деч йодым.
«Кодшо кугарнян йочасадын пашаеҥже-влак, йоча ден ача-ава-влакым куандараш манын, йомакласе герой-влакым лум дене ненчаш уремышке лектыныт. Эн ончыч икмыняр лумъеҥым ыштеныт. Тылеч посна 2019 ийын символжым – Сӧснам – ненчыме. А эн тӱҥжӧ – вес идалыкыш куанлын вончышаш улына, сандене Куголям ыштыде кертын огынал. Тек тудо торашке волгалтеш. Нине фигур-влак еҥ-влакын шӱм-чонышкышт У ий ден йомак шӱлышым пуртат манын шонена», – каласыш Анжела Николаевна.
Э.Терентьева.