Волжский район Приволжский посёлкышто илыше Надежда Фёдоровам кидпашалан аваже шӱмаҥден. Тунам ӱдыр эше школышто веле тунемын. «Шарнем, авам мыйым пидаш кумылаҥдаш толаша, а мый шортын-шортын торешланем… Вара эркын тунем шуым, тапычкым, упшым пидаш тӱҥальым… Кызыт ынде авамлан тунам мыйым туныктымыжлан моткоч тауштем!» – ойла Надежда.
Надян профессийже чоҥымо да отделке паша дене кылдалтын, ӱдыр Волжск оласе строительно-промышленный колледжыште мастерлан тунем лектын. Тидланат тудо штукатур-малярлан пашам ыштыше аваже Галина Владимировналан кӧра тунемын. Вет ӱдыр икмыняр жап тиде пашаш аваж дене пырля коштын.
У шӱлыш дене…
Н.Фёдорова ешан, кок шочшан. Лачак йоча-влак дене шинчыме жапыште Надежда кидпашам ышташ утларак жапым муын.
– Училище деч вара марлан кайышым, ончыч ӱдырна, вара эргына шочыч. Лачак тудо пагытыште моткоч шуко пидынам. Сылне тапычке, упш, кардиган-влакым ончыч Интернетыште ончен ыштенам, а вара келшыше размерым шке ышташ тунемынам. Шукыжым лишыл еҥем-влаклан пӧлекленам, икмыняржым ужаленам.
Кызыт изолон гыч кугу роза-влакым ыштылам. Электротул дене волгалтарыме пеледышым интернетысе лаштыкыш ик гана луктымат, тылеч вара я икте я весе тыгайым ыштен пуаш йодыт. Еҥ-шамычлан келша. А мый уло кумылын ямдылем. Тыгак тӱрлӧ вургемым, модышым, мочылам пидам, поделке-влакым ыштылам, – каласкалыш Надя.
Йоча-влаклан
Надежда Владимировна ынде кок ий наре Приволжский посёлкысо 2-шо номеран йочасадыште изирак воспитательлан пашам ышта. Тыште тудын пидын моштымо мастарлыкше эшеат пайдале. Икшыве-влак иктаж сценкым, йомакым ямдылат гын, йочасадыште вургем шотышто нимогай нелылык уке, вет йӧратыме воспитательышт тыманмеш мо кӱлешым пидын пуа. Мутлан, йоча-влак вуйышкышт чатка маскым упшалытат, йомакысе геройыш савырнат.
Надя шке шочшыжланат тӱрлӧ вургемым, оҥай модышым, курчак-шамычлан чиемым пидеш. «Парня театр» икшыве-шамычлан поснак келша. «Йочада-влаклан кӧранаш гына кодеш – тынар мотор да пайдале кидпашам ыштеда…» манмемлан Надежда вашештыш:
– Мый чонем йодмылан кӧра пидам. Тиде паша шкемым куандара. А йоча-влак кидпашамлан йывыртат, модыт, эше иктаж-мом пидаш йодыт… Тыге утларак кумылаҥам веле. Лишыл еҥ-влакын поро мутышт эреак вий-куатым пуа. Мылам кокам Валентина Владимировна Антонова эре ойла ыле: «Надя, пид, пид, тыйын чылажат моткоч чаткан да моторын лектеш…» А мый шулдыраҥам. Ты шотышто пелашемланат тауштем. Тудо чыла шотыштат мылам сай эҥертыш…
Надежда Фёдорован ойлымыж почеш, кидпашам кеч-кӧат ыштен кертеш, кумыл гына лийже. Но, чыным каласаш гын, кид дене ыштыме теве тыгай моторлыкым ужатат, умылет: тыгай мастарлыкым Юмо гына пуэн кертеш.
