Медведево район Кузнецово селаште илыше Снежана Вараксина ынде кокымшо ий У ий пайремлан Лумӱдыр костюмым чия да икшыве-влак деке вашка.
Снежана Юрьевна йочасадыште пашам ышта. Параньга район Лажмарий ялын шочшыжо йочасадыште тыршаш тӱҥалам манын шоненат огыл. Ӱдыр Кугу Пумарий школышто шинчымашым поген. Мураш йӧратен, садлан музык урокыш куанен коштын, конкурслашке ушнен да ончыл верлаш лектын. Тыгак физкультур урок тудлан келшен. 9-ше классым тунем пытарымеке, Снежана Йошкар-Оласе торгово-технологический колледжыш тунемаш пурен. Студентке тунамат муро конкурслаште мастарлыкшым терген, почеламутым сылнын лудмо конкурсышкат ушнен.
– Колледжым тунем пытарен шым шукто, Москош пашам ышташ кудальым, тунам ешыште куштылго огыл пагыт ыле. Ик ий гыч шочмо кундемышкем пӧртылынам. Пӱрымаш мыйым Кузнецово селаш конден. Кызыт тысе «Улыбка» йочасадыште пашам ыштем, – каласкала С.Вараксина.
Ончыч Снежана Юрьевнам младший воспитательлан пашаш налыныт. У пашаеҥын икшыве-влак дене кылым вашке муын моштымыжым ужын, коллегыже-шамыч тудлан воспитатель профессийлан заочно тунемаш пураш каҥашым пуэныт. С.Вараксина ынде кокымшо ий – студент-влак радамыште. Ӱмаште воспитательлан ышташ тӱҥалын. Марий шӱлышан коллектив тудым сайын вашлийын, поро мут денат, каҥаш денат эре полша.
– Пашаште эртаралтше мероприятийлаште тӱрлӧ образым чоҥенам. Но ик эн йӧратыме – тиде Лумӱдыр. Йӱштӧ Кугыза дене икшыве-влак деке унала миена, У ий дене саламлена, пырля модына да пӧлекым кучыктена. Южо изи икшывыже Лумӱдырым икымше гана ужеш. Нуно мемнам пеш ӧрын да тунамак куанен, шинча йӱлен ончат. Икте аптыраненрак пелешта, тыгай годым поро шомакым ойлет, мокталтет, да йочан кумылжо почылтеш. Весе дене гын вигак кылым муаш лиеш. Кажне йоча тӱрлӧ, кажныжым ужын да шижын моштыман, – ойла Снежана Юрьевна.
Тений шошым С.Вараксинам завхозлан шогалтеныт. Туге гынат иктаж воспитатель черлана але пашаш лектын ок керт гын, Снежана Юрьевна тудым эре алмашта. Мурымо конкурслашкат ушна. Концерт але вес мероприятий годым уло кумылын муралта. Марий улмыж дене тудо кугешна. Ӱмаште, мутлан, марий тувыр дене войзалтме фотосессийыш ушнен. Шкеж гаяк чолга марий ӱдыр-влак дене палыме лийын.
Яра жапше годым Снежана пидаш йӧрата. Ончыч мочалке-влакым пидын, вара – турлӧ модышым, а кызыт утларакшым мотор курчак-влакым «шочыкта». Кидпашаже-влакым пайремлан пӧлек шотеш кучыкта, пидын пуаш йодшо-шамычат улыт.
Шке пашажым С.Вараксина йӧратен ышта, садлан нойымым ок шиж. А кастене уло кумылын мӧҥгыжӧ вашка, вет тудым тушто йӧратыме ешыже вуча.
С.Вараксинан альбомжо гыч налме фото.