Морко посёлкысо 1-ше номеран школышто тунемше Максим Кучеров «Кугарня» газетын эртарыме «Йомак тӱня» конкурсышто сеҥышыш лектын ыле. Тудлан пӧлек шотеш йомак тоштерыш билетым пуымо. Рвезе нылымше классыште тунемеш. Кеҥеж каныш жапыште ешыж деен пырля тоштерыш миен толын. Сенрышыштыже мыланна тыге возен колтен:
— «Ший пӱан Пампалче» тоштерыште пеш келшен. Тушто чылажат оҥай лийын. Мый марий калыкын ожнысо илышыж нерген пален нальым, кучылтмо ӱзгаржым ужым. Экскурсовод «Ший пӱан Пампалче» йомакым тӱрыс каласкалыш, марий калыкын талешкыже-влак нерген ойлыш. Патыр-влакын чиемышт дене палдарыш, чиен ончашат пуыш. Тидыже мыланем эн чот келшыш. Пытартышлан мыланна марий-влакын кумалме верышт нерген каласкалыш. Тоштерыш уэш кайымем шуэш. Теат тушко миен толза.
Пагалыме лудшына-влак. А те Марий Элыште могай ямле верлаште лийында? Фотом редакцийыш колтыза, ты вер нерген изирак текстым возыза. Кум эн оҥай пашан авторжылан пӧлек лиеш.