Йомак сынан У ий пайрем

Республикысе школлаште марий йылмым тунемше ӱдыр-рвезе-влаклан 23 декабрьыште М.Шкетан лӱмеш марий драмтеатрыште эртарыме У ий пайрем, чынжымак, йомакыш савырнен. Тушто нуным марий Йӱштӧ кугыза ден Лумӱдыр, йомакысе тӱрлӧ персонаж-влак куанен вученыт.

Тиде пайремыш республикысе школлаште тунемше, идалык мучко тунеммаште, тӱрлӧ таҥасымаште да олимпиадыште ойыртемалтше йоча-влак погыненыт. Иктышт почеламут конкурслаште мастарлыкыштым ончыктеныт гын, весышт Марий тӱвыра рӱдерын онлайн йӧн дене эртарыме конкурслашкыже ушненыт. Чыланат мотор деч мотор, утларакшым тӱрлыман марий тувырым чиеныт. Кажныжын тиде кечын шӱмжӧ вургыжын, вет тыгай пайремыш логалаш икшывылан – кугу пиал.

Пайрем «Кум ака-шӱжар» спектакль дене тӱҥалын. Калык йомак негызеш шындыме постановко ӱдыр-рвезе-влаклан моткоч келшен. Нуно спектакльын геройжо-влак дене пырля йомак тӱняш логалыныт, осал ден порылыкым ойыраш тунемыныт.

Спектакль деч вара йоча-влакын эн вучымо унашт, Йӱштӧ кугыза ден Лумӱдыр, тыгак йомакысе йолташышт-влак пайремыш юзо шӱлышым пуртеныт.  Нуно ӱдыр-рвезе-влак дене пырля мурым муреныт, модыныт. Икманаш, жапым веселан эртареныт.

Сеҥыше-влак

Тений  Марий тӱвыра рӱдер онлайн йӧн дене икмыняр конкурсым эртарен. Тиде кечын сценыште сеҥыше-влакым палемденыт.

Шыжым эртарыме «Авам дене пырля» конкурсышто ончыл верыш Советский район Солнечный кыдалаш школышто тунемше Дарья Аптиева ден аваже И.Б.Сидорова лектыныт.

«Мунло» интеллектуал марафонышто Гран-прим Шернур районын «Шернур-Марисола» командыже (капитан Д.Веденькин) налын.

«Йӱштӧ кугызалан серыш» конкурсышто Советский район Роҥго гыч Софья Яковлеван, Оршанке районысо Кугунур гыч Матвей Садовинын, Волжский район Пӧтъял гыч Илья Максимовын пашашт-влакым эн сайлан шотлымо.

«У ий чием» конкурсышто Оршанке район Кугу Ӧрша гыч Настя Рябинина, Кужэҥер район Коҥганур гыч Валерия Шутолева, Волжск ола гыч Валерия Кузьмина ойыртемалтыныт.

«У ий дене» видеосаламлымаш-влак  Советский район Кужмарий гыч Иван Кудрявцевын, Морко районысо Шӱргыял школ гыч Венера Кириллова ден Ярослав Гавриловын, Шернур район Казанский гыч Богдан Конаковын эн чапле лийыныт.

Сеҥыше-влак чапкагаз да  пӧлек-влак дене палемдалтыныт.

Тыгай сынан пайрем йоча-влаклан, мутат уке, куан шӱлышым, юзо вийым пӧлекла. Тыгодымак икшыве-шамычлан шочмо йылмын кӱлешлыкшым ончыкта, тудым йӧраташ кумылаҥда.

Ӱдыр-рвезе-влаклан умбакыжат тыгаяк чолга лияш тыланена. Шушаш у ий у сеҥымаш-влакым кондыжо!

 

Настя Рябинина «У ий чием» конкурсышто 6-9 ийготан-влак коклаште сеҥышыш лектын.

Ӱдыр Оршанке район Кугу Ӧрша школ пеленысе йочасадыш коштеш, вес ийын икымше классыш каяш ямдылалтеш.

Тиде конкурсыш ушнаш аважлан, Инесса Рябининалан, тӱҥалтыш класслам туныктышо Татьяна Сергеевна Козлова темлен. Шуко шоныде, Инесса Витальевна Настя ӱдыржӧ дене пашалан пижыныт.

Костюмым ик йӱдыштӧ ямдыленна. Персонажым «Красная шапочка» руш йомак гыч налынна да марий сынаным ыштенна. Упшлан тӱрым кокам тӱрлен. А тувырым йочасадыште налме. Тыгайрак сынан тувыр-влакым йочасадыш коштшо икшыве-шамычлан ава-влак шкеак тӱрленна», — каласыш И.Рябинина.

 

Мый шымше классыште тунемам, тышке авам дене пырля толынам. Тыгай пайремыш кокымшо гана логалынам. Мый «У ий дене» видеосаламлымаш конкурсыш ушненам да шке таҥашем-влак коклаште икымше верыш лектынам.

Видеосаламлымашын сценарийже  тыгайрак: мый книгам лудынам да мален колтенам. Вара пуйто кожлаш логалынам. Тушто Йӱштӧ кугызам вашлийынам. 

Видеосаламлымашым ямдылаш класс вуйлатыше Мария Эриковна Гринчук полшен. 

 

Иван Речкинын фотожо-влак.