Таче кечын ӱдырамаш-влак тӱрлӧ аланыште пашам ыштат. «Тиде профессий лач пӧръеҥ-влаклан» манын шонышо еҥже укеат дыр. Кызыт ӱдырамаш-полицейский але ӱдырамаш-космонавт дене нигӧм огыт ӧрыктаре. Ӱдырамаш-влакын тӱнямбал кечышт вашеш тыглай огыл профессийыште тыршыше икмыняр еҥ дене палдарена.
С.Ф.Алмазова Йошкар-Олаште йолчиемым ачалыме пунктым куча.
Оршанке районын шочшыжо Светлана Фёдоровна Йошкар-Олаште ила. Изиж годым медик лияш шонен гынат, школ деч вара Йошкар-Оласе строительный техникумышто чоҥышо-прораблан тунемын. Но тиде профессий дене пашам ыштен огыл. Йошкар-Оласе йолчием фабрикыште, вара «Мариобувьбыт» предприятийыште 10 ий закройщицылан ыштымеке, шкенжын изирак бизнесшым почын.
– Шке пашам 10 ий ончыч почынам. Тиде сомыл чонемлан келша. Клиент-влак шагалын огытыл, мый декем чӱчкыдын коштшо-влакат улыт. Йолчиемым ачалыме годым шонкалет, моторракым ыштен пуаш тыршет. Клиентлан келшыже, куанен чиен коштшо манын шонем. Йӧратыме пашам пытартыш жапыште начаррак шийвундым пуа. Еҥ-влак йолчиемыштым шуэнрак кондат. Кызыт ыштен лукмо йолчием шуко жаплан ок чыте, вашке пыта. Тудым кудалтат да весым налыт. Клиент-влак тышке толытат, шукынжо мыйым ужмеке, ӧрыт. Йолчиемым ачалыме пунктышто чӱчкыдын огыл ӱдырамаш мастерым ужаш лиеш.
Светлана Фёдоровна дене кутырен шогымем годымат кум еҥ толын кайыш. Икте йочажын йолчиемжым конден да «Иктаж-мом ышташ лиеш мо але кудалташ веле?» манын, эргыжын сандалижым коден кайыш, весе ачалыме ботинкыжым налаш толын. С.Ф.Алмазован паша вержат ойыртемалтеш: этажеркыште тӱрлӧ мотор кушкыл одарланен кушкеш, чыла шке верыштыже кия. Чынжымак, ӱдырамаш йырже моторлыкым шара.
Кумданрак – газетнан 4-ше мартыште лекше номерыште.
Ирина Александрова.