Россий Федераций Кугыжаныш Думын депутатше-влак пытартыш кумшо лудмаште Россий президентын посланийжым шуктымо шот дене «Единый Россий» партийын темлыме социальный положенийжым пеҥгыдемденыт. Тушто Российысе еш-влаклан полшымо шот дене икмыняр ешартыш льготым палемдыме.
♦ Тышеч иктыже – 7 ияш марте (тынар ияшат шотыш налалтеш) йоча-шамыч дене больничныйыш кайыше ача але авалан пашадарын 100 процентшым тӱлымаш. Тиде илышыш тений 1 сентябрьыште пура.
♦ Тылеч посна мӱшкыран ӱдырамаш-влак учётыш тӱҥалтыш срокышто шогалыныт да неле илыш ситуацийыште улыт гын, нунылан кажне тылзын выплатым тӱлаш палемдыме. Тыгай льгото дене регионлаште ик еҥлан илен лекташ кӱлмӧ эн изи кугыт деч шагал парыш лекме годым пайдаланен кертыт. 1 июль гыч тыгай пособий кокла шот дене 6350 теҥге лиеш. «Ончылгоч шотлен лукмо почеш тыгай полыш 630 тӱжем ӱдырамашлан пуалтеш», – ойлен «Единый Россий» фракцийым вуйлатышын икымше алмаштышыже А.Исаев.
♦ Вес тӧрлатымаш 8-16 ияш йоча-влаклан пуымо пособий шотышто лиеш. Тыгай ийготан шочшым ача але ава шкетын онча. Тыгодым тудын алиментым тӱлымӧ шотышто судын пунчалже лийшаш, ешын парымже ты регионысо илен лекташ кӱлмӧ эн изи кугытым эртышаш огыл. Тыгай пособий кокла шот дене 5360 теҥгеш шуэш да 1 июль гыч тӱлалташ тӱҥалеш.