Йошкар-Олаште илыше 34 ияш ӱдырамашын эргыжым мошенник-влак ондаленыт.
Школьниклан ик мессенджерышкыже увер толын, пуйто тудо телефон ден наушникым модын налын. Гаджет-влакым налаш манын рвезе ссылке почеш эртен. Тылеч вара тудлан смс толын: пуйто тудо законым пудыртен, ынде аважым уголовно мут кучаш шогалтен кертыт, но тидым иктыланат ойлыман огыл.
Лӱдмыж дене рвезе мошенник-влакын ойлымышт почеш ыштен. Йӱдым аважын телефонжым налын да банк приложений гоч шке счётышкыжо 20 тӱжем теҥгем колтен, тушечын – мошенник-влаклан. Тылеч вара аферист-влак рвезылан приложений гоч кредитым оформитлаш да оксам палемдыме счётыш колташ полшеныт. Эҥгек 67 тӱжем теҥгеш шуын, палдара Марий Элысе МВД.