
Самырык-влак яллаште пашам ынешт ыште манын чӱчкыдын ойлат гынат, тусо школлаште самырык туныктышо-влак шагалын огытыл. Теве У Торъял район Кугу Нурмо ялын шочшыжо Т.Яшметова Тошто Торъял школыш икмыняр ий ончыч англичан йылмым туныкташ толын.
Йоча годсо шонымаш
Тукымыштем туныктышо профессийыште тыршыше-шамыч уке улыт манын палдарыш Татьяна Аркадьевна. Ачаж ден аваже колхозышто пашам ыштеныт, кок акажат вес корным ойырен.
9 классым шочмо ялысе школышто тунеммеке, ӱдыр Советский район Ушнур школышто гуманитарный классыште шинчымашым поген. Тунемме деч посна тӱрлӧ мероприятийыш чулымын ушнен. Школыштак англичан йылмылан шӱмаҥын. Ты предмет дене районысо олимпиадыштат участвоватлен.
Т.Яшметова эше школыш коштмыж годымак туныктышо лияш шонен пыштен да 11 класс деч вара МарГУ-н студенткыже лийын. Марий да англичан йылмылам туныктышо специальностьым налын.
Корно – школыш
– Тошто Торъял школыш 5-ше курсышто тунеммем годым практикыш толынам ыле. Моткоч келшен. Республикысе ик семинар годым практикант семын уна-влак ончылно урокымат эртаренам.
Но университет деч вара, кугурак пашадарым кычалын, вес пашаш пуренам. Тушто тыглай пашазе гыч менеджер марте кушкынам. Школышто туныктымем шуын, но тунамак кӧргыштем ала-могай тургыжланымаш, лӱдмашат лийыныт, – каласкала Т.Яшметова.
Варажым ешан лиймеке, икшыве-влак кушмо семын самырык ава школыш туныкташ кайыме нерген шонкалаш тӱҥалын. Ончыч У Торъял район Элембай тӱҥ школышто кум ий туныктен. Тидыже ты профессийыште йолӱмбак пеҥгыдын шогалаш сай тӱҥалтыш лийын, вет тушто опытан туныктышо-влак самырык специалистым порын вашлийыныт да йодмо годым эре полшеныт. А кум ий ончыч Тошто Торъял школыш куснен – тыге йӧнанрак, вет паша верже мӧҥгыж дек лишкырак.
Йот йылмым палынешт
– 2023 ийыште сентябрьыште Тошто Торъял школыш толынам. А ты тунемме ийын классым вуйлаташ ӱшаненыт. 13 ӱдыр-рвезылан (школышто эн кугу класслан шотлалтеш) кокымшо аваш савырненам. Пашам оҥай, но тыгодымак ответственность моткоч кугу. Коллегем-шамычлан тауштем – нунылан кеч-кунам эҥертен кертам.
Тунемше-шамыч икте-весышт деч ойыртемалтыт. Иктышт – моткоч чолга, весышт вожылшырак улыт. Но кажне гаяк классыште англичан йылмылан шӱман ӱдыр-рвезе ятыр, тиде поснак кумылым нӧлта. Нуно йот йылмым келгынрак тунемнешт, ончыкыжым ты йылмым палыме кӱлеш лиеш манын умылтарат. Кӧ гын, кушкын шумекыже, тӱня мучко путешествоватлаш шона, садлан англичан йылмым сайын палынеже. Изирак йоча-влак дене урокым эртараш пеш келша, нуно чон йӱлен тыршат. Урок годым физкультминуткым эртарена, видеоурокымат ончен шуктена, мурым мурена. Шинча дене ужмо информацийым нуно сайынрак шарнен кодыт. Аудирований йӧн дене изирак класслаште тунемше-шамыч дене чӱчкыдынрак пайдаланем гын, кугурак класслаште текст дене пашам ыштена. Вара тудым лончылена, ӱдыр-рвезе-шамыч мом шарнен кодмыштым, умылымыштым каласкалат, – ойла Т.Яшметова.
Икте-весым кумылаҥден
Урок-влак деч вара Татьяна Аркадьевна ден тунемше-шамыч театральный мастаргудо кружокыш погынат. 4-5-ше класслаш коштшо ӱдыр-рвезе-шамыч дене шукыж годым тӱрлӧ постановкым ямдылат. Сценарийым шкеак возат, костюмым кычалыт, келыштарат. Ончыч йоча-влакын тургыжланымышт, вожылмышт шижалтын гын, кызыт кружокыш кумылын коштыт, сценыш лектын модаш нунылан келша манын палдара вуйлатышышт. Вет Татьяна Аркадьевна шкежат сценкылаште пырля модеш, тудат нунын гаяк тургыжлана. Тыге, икте-весым кумылаҥден, сценыш лектын, толшо-влаклан чапле номерым ончыктат.
Туныктышо лияш, мутат уке, куштылго огыл. Тудо йоча-влак деч пеҥгыдын йодшаш веле огыл, шкежат сай примерым ончыктышаш. Йоча-влакым йӧратыман, кумылыштым волтыман огыл, вет нуным от ондале – чыла шижыт манын палемда Татьяна Аркадьевна. А тунемше-шамыч сай лектышышт дене куандарат, нунын ача-аваштат умылышо лийыт, а коллеге-шамыч полшат гын, пашам ышташ кумыл нигунам ок йом. Татьяна Аркадьевнан йырже лач тыгай еҥ-влак улыт.
Т.Яшметован альбомжо гыч налме фото.