самырык туныктышо М.А.Скуратова.
Марина Александровна У Торъял район Тошто Торъял школышто англичан йылмым туныкта.
Туныктышо-влак шӱмаҥденыт
Тудо Морко район Ердӱр ялеш шочын. Кокласола школышто тунемын, вара МарГУ-ш Финн-угроведений институтыш тунемаш пурен. «Школышто йылме-влакым келгын тунеммынна. Тидын шотышто англичан йылмым туныктышо Татьяна Петровна Арганякова да марий йылме ден литературым туныктышо Нина Вениаминовна Иванова кугу надырым пыштеныт. Нуно мемнам йылмым йӧраташ, чын да сылнын кутыраш кумылаҥденыт, – манеш М.Скуратова. – Нунын пашаштым ончен, шкежат илышем туныктышо профессий дене кылдаш шонен пыштенам. Студентем годым тӱрлӧ вере миен коштынам: Мордовийыште, Удмуртийыште, Венгрийыште лийынам».
Визымше курсышто улмыж годым ӱдыр Советский район Кукмарий тӱҥ школышто практикым эртен. Тушто туныктышын пашаж дене сайынрак палыме лийын. Йоча-влак дене кылым муаш тӱрлӧ йӧным кычалын, шке шинчымашым келгемден. Дипломым налмеке, илыш корныжо Торъял районыш конден. Тыште ончыч Элембай тӱҥ школышто пашам ыштен, вара Тошто Торъял кыдалаш школыш куснен. Тиде школышто 7 ий тырша, англичан йылмым туныкта.
Кружокым вӱда
«Кажне ийын у тунемше-влак толыт, нунын дене ыштыме паша ойртемалтеш. Эн тӱҥжӧ – йочам тунемаш кумылаҥден моштыман. Тунам туныктышынат, тунемшынат пашаже икшырымын каяш тӱҥалеш», – ойла самырык туныктышо.
Туныктымо паша деч посна Марина Александровна «Театральная мастерская» кружокым вӱда. Ӱмаште Тошто Торъял школ «Лукойл» ПАО-н эртарыме конкурсыштыжо грантым сеҥен. Тыге кружокын материально-технический базыже пойдаралтын, кидеш чийыме курчак-влакым налыныт, пӧлемым олмыктеныт.
Кызыт Марина Александровна визымше классым вуйлата. «Тений шошым классем школ дене чеверласен, тиде мыйын икымше выпускем ыле. Нунын дене пырля шкежат шуко ум пален налынам. Мый веле огыл, нунат мыйым шке семынышт туныктеныт. Классем нерген поро шарнымаш гына кодын. Келшен пашам ыштенна, – каласкала туныктышо. – Визымше классыште тунемшем-влак дене олимпиадыш, усталык конкурслаш, акцийлаш ушнена. Пырля экскурсийыш коштына, шочмо-кушмо кундемна дене сайынрак палыме лийына. Ваш полшаш, нелылык гыч лекташ тунемына».
Класс вуйлатышын сомылжо моткоч шуко. Эр гыч кас марте туныктышо – йоча-влак пелен. Нунын дене пырля иктаж мероприятийлан ямдылалтыт, чон почын кутыралтат, кажне кечын икшывым ончыкылык илышлан ямдылыман.
Пуртӱсыштӧ лияш йӧрата
М.А.Скуратова поро кумылан, умылен моштышо айдеме, кеч-кунамат полыш кидым шуяш эре ямде. Паша ятыр жапым налеш гынат, яра жап лийме годым пӱртӱсышто лияш йӧрата, книгам лудеш. Эше тудлан кочкаш шолташ келша, тыгак пӧлемысе тӱрло кушкылым шындылеш.
Тений М.Скуратова Марий самырыктукым слётыш ушнен. Тушто шкеж гаяк чолга да чулым ӱдыр-рвезе-влак дене палыме лийын, шкаланже шуко ум пален налын.
Шке пашаж нерген Марина Александровна чон вургыж, шинча йӱлен каласкала. Чӱкталтше тиде тул самырык туныктышын ойырен налме куштылго огыл профессийыштыже корным тек кужу жап волгалтара.