22-28 январь – Азам ыштен кертме тазалыкым аралыме арня
Калыкын тазалыкше нерген ойлымо годым ава ден йочан тазалыкышт, тидын шотыштак азам ыштен кертмаш да мӱшкыран улмо жапым сайын эртарымаш, ик эн тӱҥлан шотлалтыт. Российысе Тазалыкым аралыме министерстве «Репродуктивное здоровье» проектым ямдылен.
Аза таза шочшо манын, мӱшкыран лийме жаплан ончылгоч ямдылалтман. Вате-марий мӱшкыраҥаш шонымо деч кум-ныл тылзе ончычак (пел ий ончыч эшеат сайрак) тазалыкыштым тергаш тӱҥалшаш улыт, кӱлеш анализ-влакым сдатлыман, акушер-гинеколог деке миен толман. Тергалтмеке да экшыкым мумеке эмлалташ тӱҥалман. Пӱйым эмлыман, азагудышто улшо азалан инфекций ынже логал манын, чыла инфекцийым ончылгоч эмлыман.
Йочам ышташ эн келшыше ийгот – 20-35 ий. А латкандаш ияш марте мӱшкыраҥше ӱдырын организмже тыгай нелытлан эше ямде огыл, ӱдыр чылажымак сайын огешат умыло.
Мӱшкыраҥаш келшыше эн сай жап – кеҥеж мучаш да шыже тӱҥалтыш, тунам организм каналта, витамин да тӱрлӧ минерал дене пойдаралтеш.
Вате-марийын иммунитетышт лунчырген гын, нуно чӱчкыдын кылмен черланат. Хронический чер-влак шкешт нерген телым чӱчкыдынрак шижтарат гын, мӱшкыраҥаш шошым тыршыман.
Мӱшкыраҥаш шонымо жапыште сай кумылан лийман, стресс шочшаш азан тазалыкшым локтылеш. Садлан ончыкылык ньога дене пырля шкежат вашталташ ямде лийман, тӱням йӧратен моштыман.
Виктор Дробышев,
Марий Элысе Тазалык аралтыш министерствын тӱҥ акушер-гинекологшо.