Людмила Григорьева, «Ямде лий» газетын тӱҥ редакторжо:
– Тений озавате-влакым кабачок ден кавун лектышышт дене куандареныт. Нунын дене йоча-шамычлан ондалчык ананасым ямдылаш лиеш. Тидлан кабачок але кавун шӱмжым эрыктыман, кӧргыжым кораҥдыман. Кабачокым оҥго семын, а кавуным тыгыдынрак пӱчкедыман. Пӱчкедымеке, нелытше кок килоат пеле чоло кодшаш. Кок литр ананас сокым кевытыште налман. Тушко 350 грамм сакырложашым, ик изи совла лимон кислотам пыштыман да шолтыман. Шолаш пурымеке, тыгыдемдыме кабачокым але кавуным ешарен, пел шагат шолтыман. Вара стерилизоватлыме банкылаш опталын, калай петыртыш дене петырыман.