Марий Элым Вуйлатыше Ю.Зайцев «Ёлка желаний» всероссийский акцийыш ушнен.
У ий кож гыч эн ончыч Шернур районышто илыше Настя Элембаеван шаржым налын. Ӱдыр 11 ияш, У ийлан коньким вуча. Волжск ола гыч тудын таҥашак Дарья Веденеева смарт-шагатан лияш шона. Марий Турек районышто илыше 16 ияш Сония Смоленцева алмазный мозаике наборым пӧлеклаш йодын. Тыгак Вуйлатыше кум ияш Кирилын шонымашыжым шукташ сӧрен, тудо У ийлан велосипедым вуча.
«Ёлка желаний» акцийым йоча да самырык-влакын «Движение Первых» Российысе толкынышт эртара. Тушко начар тазалыкан, тулык да ача-аван попеченийышт деч посна кодшо, Донецк ден Луганск калык республиклаште, Запорожский да Херсон областьлаште илыше, военнослужащий ден СВО участник-влакын 3 ияш гыч 17 ияш марте йоча-шамыч ушнен кертыт.