Тений Звенигово олаште эртаралтше Марий самырык тукым слётыш ятыр чолга ӱдыр-рвезе толын. Нунын коклаште иктыже – Шернур посёлкын шочшыжо Анастасия Заболотская.
Марий шӱлышан еш
Кызыт районлаште, поснак кугу посёлкылаште, йоча-влак шочмо йылмышт дене огыл, а рушла мутланат. Амалже, пуйто йочасадыште чылан рушла кутырат. Шернур посёлкышто шочын-кушшо ӱдыр тидын шотышто чылажат еш гыч тӱҥалеш манын вашештыш.
– Ешыштына марла мутланена. Мый изинек марий семым йӧратыше кушкынам. Авам Татьяна Сергеевна яндар йӱкан, мураш чот йӧрата. Районышто эртаралтше ик мероприятийыште авам дене пырля мурым муренна. Елена акамат мурен мошта. Тудын денат икмыняр гана сценыш пырля лектынна. Кочам Сергей Иванович Созонов гармоньым устан шокта. Пайрем годым уло еш, ӱстел йыр погынен, кочамын гармонь семже почеш калык мурым муралтена, – ойла Настя.
Музыкым йӧрата
Марий ӱдыр Шернур посёлкысо 1-ше №-ан школышто тунемын. Тыгодым йоча усталык пӧрт пеленысе «Серебряный родничок» ансамбльыште мурен. Тудым Татьяна Иванова Рыбакова вуйлатен.
– Татьяна Ивановна деке эше гитарым шокташ коштынам. Икымше гана кугу сценыш 2016 ийыште лектынам. Йошкар-Оласе Сеҥымашын XXX идалыкше лӱмеш тӱвыра пӧртыштӧ «Песенка года» конкурсышто участвоватленам. Тылеч вара районысо, республикысе ятыр фестивальыште мастарлыкем ончыктенам, – палдарыш А.Заболотская.
Школышто тунеммыж годым Настя шке илышыжым сымыктыш тӱня дене кылдаш шонен. Кызыт тудо И.С.Палантай лӱмеш тӱвыра да сымыктыш колледжын кокымшо курсын студенткыже. Артист-вокалист лияш ямдылалтеш. Самырык ӱдыр, фортепианом шоктен, чонжым лыпландара.
Яра жапше годым тортым кӱэштеш. Тидлан интернет гоч лӱмын курсым эртен. Ончыкшым Анастасия вокал дене туныктышо лийнеже, йоча-шамычым музыклан кумылаҥдынеже.
Михаил Скобелевын фотожо.