Оньыкувам – пӱсӧ йылман, шакше койышан ӱдырамаш. Ӱмыржӧ мучко нигушто пашам ыштен огыл, оньыкугызан шӱйыштыжӧ шинчен. Тудын колымекыже, мемнан деке илаш толын.
Ме пелашем дене коктынат эр гыч кас марте пашам ыштенна. Ончычшо икшывына-влакым ончаш няньылан тӱленна, тидлан пелашемын пел пашадарже каен. Садлан оньыкуван мемнан деке илаш толмыж дене ты шотышто куштылгырак лиеш манын шоненна. Тудо уныкаже-влакым тӱрлӧ тамле сий дене куандарен, йомакым лудын, воспитатлен. Илымыж годым мыйым ик ганат «веҥе» манын огыл. Варажым тидын нерген шонымымат чарненам.
Оньыкувалан йоча-влак дене йокрок лияш тӱҥалын ала мо, тӱрлӧ семын мужедаш, шудо-влакым погаш, сымыстараш, йот вийлан ӱшанаш кумылаҥын. Ончычшо тидым шекланенат омыл. Жап эртымеке, кугурак ӱдырем коважын сортам чӱктымыжӧ, ӱпшым йӱлалтыме, кӱлеш-оккӱл мут-влакым ойлымо нерген ойлен. Мӧҥгӧ толмеке, пӧртыштӧ шикш пушым шижаш тӱҥалынам. Мо дене ӱпша манын йодмемлан тамакым шупшынам манын вашештен. Варажым йоча-влакын укена шеҥгеч мом ыштылмыжым каласкалымыштым тогдаен шуктен. Посна пӧлемыште петыралтын, шке пашажым шуктен.
Ик кечын оньыкувам шке пӧлемыштыже пире семын урмыжын. Тидын дене йоча-влакым чот лӱдыктен. Нуно мыланна нимом ынышт ойло манын, мороженыйым налын пуэн. Кугурак ӱдырна мыланем тидын нерген каласен. Оньыкуван кевытыш кайымыж шеҥгеч пӧлемжым шерын лекташ шонен пыштенам. Матрас йымалныже шем магий дене заниматлыме тӱрлӧ книгам да арверым верештынам. Ушем каен!
Толмекыже, тидын шотышто мом шонымем пеҥгыдын каласенам. Тудо ушдымыла кычкыркалаш, мыйым ты тӱня гыч жап шуде колташ товатлен. Чот сырымем дене, оньыкувам пӱтырен кучен, пӧрт гыч луктын колтенам. Варажым пелашем аважын тыгай магий дене ожнат заниматлымыж нерген ойлен, но ачаже тудым лӱдыктен, чарен кертын улмаш. Колымекыже, самырык годсо йӧратыме сомылжым ылыжтараш шонен пыштен.
Тыге йоча-влакым чот лӱдыктен. Нуно тул деч посна мален огыт керт, мӧҥгыштӧ шкет кодаш лӱдыт. Психикышт верч моткоч тургыжланенна. Тидлан кӧра пелашемлан паша гычат каяш логалын.
Андрей Т.
Козьмодемьянск ола.