Тӱняште эше ик сай врач ешаралтын манын, пеҥгыдын каласаш лиеш. Волжский район Нурмучаш Шайра ялын шочшыжо Надежда Ильина Ижевскысе кугыжаныш медицинский академийым йошкар диплом дене тунем лектын. Кызыт Нижний Новгородысо ик йоча поликлиникыште педиатрлан ышта. Тиде олаштак Приволжский исследовательский медуниверситетыште ординатурым эрта.
Н.Ильина врач лияш изинек шонен. Ондак педиатр дек приёмыш коштмыж годым, врачын пашажым эскерен, йоча-влаклан полшаш кумылжо лектын. Ты профессийлан школ годсек ямдылалт шоген, Сотнур школым шӧртньӧ медаль дене тунем пытарен, вара химий да биологий дене репетитор дек коштын.
– Тукым акам Ижевскысе кугыжаныш медицинский академийым тунем лектын. Садлан мыят тушко тунемаш пураш шонен пыштенам. Конкурс кугужак лийын огыл, но тунемаш пураш неле ыле. ЕГЭ баллем-влак кугу лийыныт, тыге студент радамыш логалынам, – каласкала Надежда. – Академийыште куд ий тунемынам. Кумшо курс марте нелырак ыле. Эше шочмо вер деч тораште улмемланат йокрокланенам. Гистологий ден биологий йӧсынрак пуалтыныт. Биохимий эн йӧратыме дисциплинем лийын. А нылымше курс деч вара чылажат оҥайын чучын: офтальмологий, лор, психиатрий, неврологий. Медвузыш тунемаш пурышо ятыр студентын тӱҥалтыште «Медицине ала мыйын огыл, ала вес профессийым ойырен налман ыле» шонымаш шочеш. Но кунам ты аланыш «логалат», тушечын утлымет ок шу.
Академийыште тунеммыж годым кажне практикым Н.Ильина Волжск олаште районысо эмлымверыште эртен. Эн чот шарнымашеш кодшо тыгай практике нылымше курс деч вара лийын, тунам студентке стационарысе врачын полышкалышыжлан ыштен.
Нижний Новгородысо йоча поликлиникыште пашам ыштымыжлан вашке ик ий лиеш. Моло участковый педиатр семынак паша кечыже кок ужашлан шелалтеш: приём да вызов-влак. Приёмыш эре шуко йоча толеш, чылаштым ончен шуктыман. Поснак шыжым да телым чӱчкыдын черланат. Утларакшым – ОРВИ дене.
– Икымше паша кечем сайын шарнем. Лӱдынам. Но тунам мый вес педиатр дене ик кабинетыште шинченам. Икымше кечынак шкаланем шуко пайдале информацийым пален налынам, пырля пашам ыштыше коллегем-влаклан кугу таум каласем. Кунам йоча уэш приёмыш толеш да «Мый тӧрланенам!» манеш, тунам кӱлешан улметым утларак шижат, – манеш Н.Ильина. – Йоча-влак дене актёрат, психологат лийман. Нуно чыла шижыт. Кажне икшыве дене кылым муман. Мый шкежат куштылго койыш-шоктышан улам, йоча гай куанен моштем, садлан дыр нунат мыланем ӱшанат да огыт лӱд.
Пашам кужу жап ок ыште гынат, педиатрын приёмжо годым тӱрлыжат лиеш. Икана вич ияш рвезе эмлалтме деч вара тӧрланен толын. Кабинетыш пурен шогалын, пӱкеныш шинчын да врачын ӱстембакыже кампетым пыштен да «Тау. Мый тӧрланышым» манын, а мӧҥгӧ кайымыж деч ончыч «Те мыйын йӧратыме врачем улыда» ойлен.
Южгунам неле койыш-шоктышан ача-ава-влакат вашлиялтыт. Нунын денат пашам ыштен моштыман. Тыгай годым самырык врачлан коллектив эре полша. Надежда Йошкар-Олаште шочын-кушшо да поликлиникыште пашам пырля ыштыше педиатр Екатерина Николаевна Левашовалан таушта. Тиде поро кумылан врач самырык специалист пелен эре лияш тыршен, каҥашым пуэн.
– Паша шотышто ончыкылыклан пеш кугу планым чоҥымаш уке. Педиатрланак пашам ышташ кумылем уло, кӧ пала, ала вес специалист лияш шонымаш лектеш. Жап ончыкта, – манеш самырык врач.
Но Надежда иктым сайын пала: еҥ-влакын эн кугу поянлыкше – тазалык. Тудын верч тыршымаште тудо вийым чаманыде тунемаш да пашам ышташ тӱҥалеш.
Н.Ильинан альбомжо гыч налме фото.