21 мартыште Морко район Унчо селаште илыш шолын, вет тушто йоча-влак Ӱярням ужатеныт. Кечыжат шыратен ончен, а пайремыш вес ялла гычат миеныт.
Йоча-влаклан Ӱярня пайремым Республикысе марий тӱвыра рӱдер шукертсек эртара. Молгунамсе семынак пайремыш республикын тӱрлӧ кундемже гыч команде-влак ушненыт. Советский, Параньга, У Торъял, Волжский да Морко районласе индеш школ гыч Унчо кыдалаш школышко погыненыт. Йоча-влак «Ӱярня такмак-баттл», «Ӱярня мелна», «Ӱярня кува» конкурслаште таҥасеныт. Вара изижат-кугужат ӱярня вара дене мунчалтеныт, паҥгам перен лукмаш, мешак дене тӧрштылмаш, вӱдвара дене вӱдым нумалмаш да шуко моло оҥай модыш дене модыныт. Пайремым кугу ӱярня оҥго дене мучашленыт.
Мероприятий тӱҥалтыште Марий Эл Кугыжаныш Погынын депутатше, «Передовик» СХА-н председательже Ю.А.Игнатьев, Унчо кыдалаш школын директоржо А.С.Григорьев да Республикысе марий тӱвыра рӱдерын вуйлатышыже В.Г.Петров калык ончылно ойленыт.
Икымше конкурс «Ӱярня такмак-баттл» маналтын. Тушто йоча-влак ты пайремлан пӧлеклалтше такмаквлакым шергылтареныт. Икымше верыш Параньга посёлкысо Б.Р.Ахматьянов лӱмеш кыдалаш школын «Кечыйол» командыже лектын. Кокымшо верым У Торъял рӱдӧ клуб системын У Торъял тӱвыра да каныме рӱдержын «Онар тукым» командыже сеҥен налын. А Советский районысо Ӱшнур кыдалаш школын «Ӱшан» командыже кумшо лийын.
«Ӱярня мелна» конкурсышто тунемше-влак шке ямдылен кондымо мелнаштым калыклан ончыктеныт. А мелнаже могай гына лийын огыл!? Тунам йырымйыр тугай тамле пуш шарлен, нерым чыгылтен. Икымше верым У Торъял район гыч «Онар тукым» команде налын. Кокымшо верым Волжский районысо Пӧтъял кыдалаш школын командыжлан пуымо. А кумшо верыште – Морко районысо Шеҥше кыдалаш школын «Кечыйол» командыже.
«Ӱярня кува» конкурс утларак творческий шӱлышан лийын. Кажне школ шке ӱярня куважым ямдылен конден да мурымаш куштымаш дене телым ужатен колтен, шошым вашлиймым калык ончылно модын ончыктен. Икымше верым Параньга районысо Кугу Пумарий кыдалаш школын «Самырык тукым» командыжлан пуымо. Тыштат Параньга посёлкысо кыдалаш школын «Кечыйол» командыже ойыртемалтын, тудо кокымшо лийын. Кумшо верым У Торъял район гыч «Онар тукым» команде налын.
Сеҥыше-влаклан дипломым, кажне командылан шергакан пӧлекым кучыктеныт. Тыгай мероприятий йоча-влаклан веле огыл, кугыеҥ-шамычланат моткоч келшен.
Надежда ЛАВРЕНТЬЕВА.
Авторын да Иван Речкинын фотошт.