Морко районышто кажне У ий вашеш «Йӱштӧ Кугызан мастерскойжо» таҥасымаш эртаралтеш. Мемнан Шӱргыял школысо «Рвезе тукым» йоча ушемыштынат тиде конкурсым пеш йӧратат.
Теве теният тӱҥалтыш класслаште тунемше-влак шуко оҥай открыткым, поделке-шамычым келыштареныт. «Ал парус» отрядын эн чолга тунемшыже Константин Сергеев Диана шӱжарже дене эн чапле ёлкым ыштеныт. Шке кид дене керек-могай сылне арверым шочыкташ тӱҥалат гынат, кугу чытыш да моштымаш кӱлыт.
Вара вожатыйна Е.В.Григорьева иктешлымашым ышта да кажне пашан авторжылан грамотым кучыкта. Тыге тунемше-влакын кумылыштым нӧлта. А эн сай паша-влакым районысо таҥасымашке наҥгая. Туштат кажне йоча грамот але сертификат дене палемдалтеш. Елена Валериановна тиде чап кагазым у тунемме арням тӱҥалме годым Россий Федерацийнан флагшым нӧлтымӧ да гимным мурымо деч вара йоча-влаклан кучыкта.
Шӱргыял школнан тунемшыже-влак пеш чолга улыт.
Стелла Кузнецова.
Снимкыште: «Йӱштӧ Кугызан мастерскойжо» таҥасымашыште сеҥыше-влак.