Ешыште йоча-влак улыт гын, ача-авалан – пеш кугу пиал. Тунам мӧҥгат куанен толат, пашашкат кумыл нӧлтшӧ лектын кает. Кӧлан верч тыршыман, ончыко кайыман – сайын умылет. Кужэҥер посёлко гыч Светлана Аркадьевна Мамаева иктаж йочам ончаш налаш да тудым пиаланым ышташ ондакак шонен коштын. Пелашыже Игорь Никифорович дене пырля кок икшывым, Олег ден Софиям, ынде кандаш ий ончен куштат.
Икте олмеш кокыт
Вате-марий Светлана Аркадьевна ден Игорь Никифорович Мамаевмыт ятыр ий Кужэҥер посёлкышто илат. Тыгеже коктынат ты районысо Йырмарий ял гыч улыт. Изинек пырля кушкыныт, самырык пагытыште келшаш тӱҥалыныт, варажым ешаҥыныт. Светлана Аркадьевна – Кужэҥер посёлкысо ик кевытыште ужалыше. Пелашыже Игорь Никифорович – шофёр, ик предприятийыште пашам ышта.
Илышыште тӱрлыжат лиеш, южгунамже нелылык денат ваштӱкнаш логалеш. Мамаевмытын ешыштышт йоча йӱк поснак ситен огыл, ийгот шке жапшым поктен. Тыге 2016 ийыште нуно еҥ йочам налаш кумылаҥыныт.
– Икшывына шочын огыл. Тидыжак йочам ешыш налаш таратен. Тидлан кӧра Йошкар-Олаште приёмный ача-ава-влакын школыштышт тунем лектынам. Ме ик ӱдырым ончаш налаш шоненна, но кок йочан лийынна. Софиян Олег изаже ыле, когыньыштымат конденна. Тунам София ныл ияш лийын, Олег – шым ияш. Изи ӱдыр вигак мемнам «ачай» да «авай» манаш тӱҥалын, а Олег – изиш варарак. Нине йоча-влаклан поснак кугу тӱткыш кӱлын. Шочмо авашт дене илыме годым тӱрлӧ уто-ситым ужын шуктеныт, лӱдшырак улыт ыле. Но мутым эре колыштыныт. Олег пеш ласка рвезе кушкеш, а София ик верыште шинченжат огеш керт.
Мутат уке, тӱҥалтыш, кум тылзыште мыланем неле лийын, но чытенам. Дисциплинылан туныктенак шогымо, пашалан кумылаҥдыме. Олег ынде 15 ийым темен, София – 12 ийым. Изаже 8-ше классыште тунемеш гын, София – 6-шо классыште. Эре полышкалат. Пӧртыштӧ арулыкым эскерат.
Ондак мыланна пеш йокрок лийын гын, таче – пеш весела. Пачерыш пурымеке, йоча-шамыч куржын мият, ӧндалыт да шупшалыт. Нуно чылт шкенан икшывына гай улыт. Эсогыл чурийвылышт денат мемнан гаяк изиш койыт. Тӱҥжӧ – школым сайын тунем пытарышт да таза гына лийышт. Олег пачеран лийже манын, ӱмаште черетышке шогалтыме.
Ме, ийготым погымеке, ача-ава лийынна. Самырык годымак икшыве-влакым налаш кӱлеш ыле манын, таче сайын палем, – мане Светлана Мамаева.
Йоча-влак тыршен тунемыт, тӱрлӧ могырым мастарлыкыштым нӧлтат. Тидыжак ача-авам куандара. Олег историй ден географийлан кумылан, тыгак конструкторым погаш йӧрата. Тыгодым кеч-мом шкеак кучен ышта, ӧрдыж гыч полышым вучен огеш шинче. Поснак ачаж воктене шогылташ тырша. Ончыкыжым кӧ лийшаш нерген кызыт утыр шонкалаш тӱҥалын. Аважын мутшо почеш, тудо каменщик лийнеже.
София – шкешотан, уста ӱдыр. Тудлан эн чот математике келша. Кушташ моткоч йӧрата, мастарлыкшым посна кружокышто нӧлта.
Еш дене пырля – тӱрлӧ верыш
Ешге жапым пайдалын эртараш манын, Мамаевмыт тӱрлӧ верыш лектын коштыт. Йоча-влак дене пырля Йошкар-Олашке, Юл эҥер воктеке, Марий Турек посёлкысо Ий полатышке миеныт. Элнан мотор вержым ончал толаш манын, ик кеҥежым Шем теҥыз воктенат пырля каненыт. Эше йоча-влак Йырмарий ялышке ковашт деке кошташ йӧратат, шоҥгыеҥлан кеч-могай паша дене полышкалат.
Мамаевмытат, йоча-влакат шонымашке шуыныт, манаш лиеш. Вате-марий шочшан лийыныт гын, икшыве-шамыч ача-авам верештыныт. Тиде огыл мо эн кугу пиал да чон ласкалык! Йоча-влак ешыш ямым пуртеныт, ача-авалан ӱшаным ешареныт да ончыко каяш вийым пуэныт.