Марий Элысе школлаште СВО-што улшо-шамычлан тӱрлӧ семын полшат. Звенигово район Кокшайск кыдалаш школышто салтак-влаклан мо кӱлешым погат, маскировочный сеткым пидыт, окопысо сортам ыштат, пайдале чайшудым ямдылат.
Сеткым пидыт, сортам ыштат
Кокшайск школышто «МЫ» волонтёр отрядым 2014 ийыште чумырымо. Тушко коштшо ӱдыр-рвезе-влак кӱлешан тӱрлӧ пашам шуктат. Пытартыш ийлаште СВО-што улшо салтак-шамычлан полышкалат. Школым вуйлатыше Марина Владимировна Тимофеева ты пашам виктарен шога.
Кызыт фронтыш 22 маскировочный сеткым, 500 утла окопысо сортам колтеныт. Тыгак ӱдыр-влак салтак-шамычлан мешакым (рюкзакым) ургат. Ончыкылан йоча-влак дене пырля кукшо шӱрым ямдылаш тӱҥалаш шонат. Тидлан тӱрлӧ пакчасаскам коштеныт. Лишыл жапыште еҥ-влакын пайдале тӱрлӧ чайшудыштым фронтыш колташ шонат.
– СВО теме мыланем лишыл, вет мыйын эргымат Карабах олаште ынде нылымше ий служитла. Мый тӱрлӧ фонд, Йошкар-Оласе Серафим Саровский лӱмеш храм, СВО-н участникше-шамыч дене кылым кучем.
Ӱмаште шыжым школ пелен гуманитарный грузым погымо пунктым почна. Тушко еҥ-влак мо кӱлешым (носким, кампетым, сакырложашым да молымат) конден пуат. Шукын чайшудым намиеныт: мӱйшудым (клевер), писте пеледышым, пӱртньыкым, локамам, вӱршудым (зверобой), вуйдеҥгем (иван-чай). Вара чыла тидым сортироватлен, коробкалашке оптедена да СВО-шко колтена.
Ӱмаште шыжым маскировочный сеткым пидаш тӱҥална. Тидлан республикыште доброволец-влаклан эртаралтше ик форумышто тунемын тольым. Йошкар-Оласе Серафим Саровский лӱмеш храмыште мыланна материалым пуат. Телым ош тӱсан сеткым пидына гын, кызыт – суралге- ужар тӱсаным. Таче мӧҥгыштат ты пашам шуктем.
Окопысо блиндажный сортам ме пӱнчӧ пӱгыльмӧ дене ыштена. Шыжым икмыняр мешак пӱгыльмым погенна да коштенна. Селаште илыше калык мыланна калай банке-влакым поген. А парафиным шкеак налынам, – ойла Марина Тимофеева.
Кукшо душым ямдылат
Оршанке район Кугунур кыдалаш школышто СВО-што улшо салтак-влаклан кукшо душым ямдылат. Тачылан фронтыш 250 комплектым колтеныт.
Тиде пашалан школышто трудым туныктышо Елена Семеновна Козлова вуйын шога. Тышке тӱрлӧ классым уша, ышташ туныкта. Елена Козлован палемдымыж почеш, материалым ончылгоч пӱчкеден пыштыме гын, тыгай комплектым йоча 15-20 минутышто ыштен шукта. Кызыт 370 кукшо душым ямдыленыт.
– Тидлан ме У Торъял школ-интернат деч тунемынна. Тушко ме ӱмаште ноябрьыште миен коштынна да кузе ыштымыштым онченна. Сандене меат ты пашам тӱҥалынна. Туныктышо-влакын оксашт кӱшеш материалым: синтепоным, гельым, куэмым – налынна. Южо туныктышо мыланна мӧҥгышт гыч материалым конден пуэн.
Тиде пашам утларакшым 5, 6, 7, 8-ше класслаште тунемше-влак ыштат. Тидлан вес тунемшымат туныктат. Тыгодым тӱҥалтыш классласе йоча-шамычым технологий урокышто ышташ туныктена. Кугурак класслаште тунемше-влакын жапышт шагал. Сандене кертмышт семын пашаш ушнат.
Ик комплектысе кукшо душыш кучылтмо инструкцийым, куэмым, пенан губкым пыштена, – мане Е.Козлова.
Йоча-влак салтак-шамычлан поро тыланымашан серыш-влакым возат, тӱрлӧ открыткым ыштат, поделкымат ямдылат.
Кугунур школын коллективше боец-влаклан тылзе еда гуманитарный полышым ышта. Мо кӱлешым погат да ялысе администрацийыш намиен пуат.
Оршанке посёлкышто, тыгак Марково ялыште окопысо сортам ыштат. Ты пашам вораҥдарен колташ манын, йоча-шамыч калай банке-влакым погаш полшат.
Е.Козлован фотожо-влак.
СВО-н участникше-влак тӱрлӧ школын выпускникше улыт. Школлаште нунын патырлыкышт, лӱддымылыкышт дене кугешнат, тӱрлӧ полышым пуашак тыршат. Тыге йоча-влакат изинек патриотизм шӱлышеш кушкыт, чын айдеме лияш тунемыт.