Калыклан психолого-педагогический да социальный полышым пуышо «Доверие» рӱдерыште тӱрлӧ пайремлан мероприятий-влакым ямдылат. 1 июнь – Йоча-влакым аралыме тӱнямбал кече. Тиде волгыдо пайрем лач йоча-шамычлан гына огыл. Ты кече кугыеҥ-влаклан эше ик гана ушештара: йоча-влакын илышышт, тазалыкышт верч ме, кугыеҥ-влак, мутым кучена.
1 июньышто «Доверие» рӱдер ӱдыр-рвезе-шамычлан «Планета детства под созвездием Добра» пайремым пӧлекла. Программыште – шовын шӱвыроҥ шоу, мороженый ден крио-шоу (тӱрлӧ экспериментым эртарат), клоун ден маймылын шоушт, аквагрим, «Маска» ден «Чебурашка» кугу курчак-влак, аниматор-шамыч дене пырля куштымаш да шуко молат.
«Доверие» рӱдерын пашаеҥже-влак кажне ешлан тазалыкым, волгыдо илышым тыланат, тек кажне еш йоча йӱк дене темеш. Икшывыда-влакым аралыза!
Рӱдерын адресше: Йошкар-Ола, Эшкинин урем, 2-шо номеран пӧрт.
Рӱдерын архивше гыч налме фото.