7 апрель – Тазалыкын тӱнямбал кечыже.
Ты кечынак Российысе регионлаште «ВСЁБЕРЕМЕННЫМ.РФ» общероссийский общественный проект почеш Мӱшкыран-влакын кечышт кудымшо ий почела палемдалтеш.
Тудын тӱҥ шонымашыже – кажне ончыкылык ава лишыл еҥ-влак деч веле огыл, кугыжаныш дечат полышым шижше. Тидлан кӧра элыштына «Продолжительная и активная жизнь» нацпроект почеш репродуктивный тазалыкым тергаш диспансеризаций эртаралтеш.
2025 ийыште кок тылзыште йочам ыштен кертше ийготан 11,8 тӱжем еҥ: 4,3 тӱжем пӧръеҥ ден 7,4 тӱжем ӱдырамаш – тудым эртен. Нунын кокла гыч 2340 еҥым диспансеризацийын кокымшо этапышкыже колтымо.
Пытартыш ийлаште республикыштына йоча шагалрак да шагалрак шочеш: 2019 ийыште – 6670, 2020 ийыште – 6642, 2021 ийыште – 6415, 2024 ийыште – 5022 аза.
Йоча шукырак шочшо манын, Марий Элыште 2024 ийыште 210 ЭКО процедурым да 145 криоперенос процедурым ыштыме.
Ӱмаште республикысе медицине тӧнежлаш 1225 ӱдырамаш азам кудалташ шонен миен, но медицине психолог дене мутланыме деч вара кумшо ужашыже ты шонымаш деч шӧрлен. Перинатальный рӱдерын консультативный поликлиникыжын «ӱшан телефонжат» кугу рольым модеш. Тушко 2024 ийыште азам кудалтыме да мӱшкыраҥме деч аралалтме йодыш дене 158 ӱдырамаш йыҥгыртен.
«Семья» нацпроект почеш республикыште 2025 ийыште репродуктивный тазалыкым тергаш 86 тӱжем утла еҥ диспансеризацийым эртышаш, тидыже 2024 ийысе 37 процентлан шукырак.
Тений Звенигово рӱдӧ райбольницыште модульный ӱдырамаш консультацийым чоҥаш тӱҥалаш да медорганизацийлаште вич ӱдырамаш консультацийым ышташ палемдыме.
Марий Эл Республикысе Тазалык аралтыш министерствын материалже почеш ямдылыме.
freepik сайт гыч налме фото.