Звенигово районысо Красногорский посёлкысо 2-шо №-ан школышто 800 наре ӱдыр-рвезе тунемеш. Ятыр икшывым Кӱшнӱр, Пӱмъял, Ошытъял, Янашплак, Эҥервож, Тошнур ялла, Илеть, Трубный, тыгак Волжский районысо Нӱлмарий (Кленовая Гора) посёлкыла гыч кок автобус шупшыкта. Икоян коллективыште 45 туныктышо тырша. Школым Тошнур ял гыч Раисия Георгиевна Михайлова вуйлата.
Школ кузе ила? Тушто могай паша шукталтеш? Тиде да моло йодыш-влакым директорын воспитатлыме паша шотышто алмаштышыже Юлия Юрьевна Казанина дене рашемдышна. Тудо 2010 ий годсек тыште тырша, тыгак информатикым туныкта.
Школым ачалышаш улыт
Школым 1975 ийыште чоҥымо. Туддеч вара тичмаш олмыктымо огыл. Сандене тений нацпроект почеш оралтым капитально ачалышаш улыт. Школышто нацпроект почеш ятыр сомылым вораҥдарыме. Йоча-влакын мастарлыкыштым нӧлташ 2020 ийыште почмо «Точка роста» рӱдер кугун полша. Тушто 10-шо дене 11-ше класслаште тунемше-влаклан информационно-технологический, социально-экономический профиль-влак дене шинчымашым пуат. Тений школ пелен психолого-педагогический классым чумырымо.
– Районышто школна шуко тунемше дене ойыртемалтеш. «Точка роста» рӱдерым «Образований» нацпроект почеш почмо. Тушто тӱҥ предмет-влаклан информатикым, ОБЖ-м, технологийым шотлыман. Рӱдер пелен физике да информатике урок-влак эртаралтыт. 10-11-ше класслаште посна профиль дене тунемыт. Физикым, информатикым поснак кумылын тунемыт.
2022 ий июльышто «Цифровая образовательная среда» федеральный проект почеш мыланна 25 ноутбукым ойырымо, информатике да физике кабинет-влаклан у оборудований-влакым пуымо. У тунемме идалыкыште школыш кугу скоростян интернетым шупшмо. Тидыже туныктышо, тыгак тунемше-влаклан цифровой, тунемме платформо-влак дене пайдаланаш йӧным ышта.
Школым тений ачалышаш улыт. Тидын шотышто ме посна проектыш пуренна. Кугу ачалыме паша деч посна мыланна у оборудований-влакым ойырышаш улыт.
Кадр шотышто нелылык уло. Школышто сулен налме канышыш лекше ятыр туныктышо пашам ышта. А самырык специалист шагал. Кодшо ийын «Земский учитель» программе почеш Чуваший гыч историйым да обществознанийым туныктышо Денис Юрьевич Трофимов толын. Йодмаш почеш биологийым да химийым ешартыш шинчымаш семын Виктория Игоревна Жулина, физкультурым Дарья Александровна Арисова туныктат. Психолого-педагогический классым почмо дене тунемше-влак туныктышо профессийым ойырен налыт манын, моткоч ӱшанена.
Красногорский кундемыште кок кугу завод уло. Туштат специалист-влак огыт сите. Сандене кодшо ийын «Электродвигатель» завод дене пырля тунемше-влаклан конкурслан положенийым ямдыленна. Заводын директоржо 9-11-ше класслаште эн сай тунемше-влаклан премийым ойыра. Тений кум тунемше тыгай премийым сулен, – мане Ю.Казанина.
Марла шагал ойлат
Провой кундем Какшамарий ялыште шочын-кушшо Светлана Петровна Бирюкова ты школышто марий йылмым 26 ий туныкта. Но ты кундемыште марий шӱлыш йомын толеш. Йоча-влак шочмо йылмым умылат гынат, марла ойлен огыт мошто.
– Чылт марла кутырышо йоча шагал. Тыште Провой велысе тӱрлӧ ялысе диалектым кучылтыт. Ончыч марий йылмым тыште шочмо да кугыжаныш йылме семын туныктымо, кызыт – кугыжаныш йылме семын гына. Тунам туныктышат шукын лийыныт. Кызыт шкетын гына тыршем. Арнялан ик урокым (тушко ИКН пура) вӱдем. Марла кутыраш тӧчышӧ-влакым тӱрлӧ конкурсыш, олимпиадыш колтем. Районышто марий йылме дене олимпиадылаште ятыр ий сеҥыше радамыш лектыт, – мане Светлана Бирюкова.
11-ше классыште тунемше Елизавета Сидорова тений школым шӧртньӧ медаль дене тунем пытарышаш. Тудо мане:
– Физике-математике направлений дене тунемам гынат, гуманитарный предмет-влак дене сеҥымашем ятыр. Кодшо ийын руш литератур дене районышто ойыртемалтынам, тений тудын дене 1-ше верым налынам, республикыште шкем тергенам. Районысо «Что? Где? Когда» интеллектуальный модмашке чолган ушненам. Ончыкылан мый инженер профессийым ойырен налаш шонем.
Красногорский школышто вучымо уна лияш куанле ыле. Школышто туныктышо-влакын тыршымыштлан кӧра тунемше-влак сай лектышыш шуыт. Посёлкышто шукыжым руш але рушаҥше марий-влак илат. Сандене марий шӱлыш тыште пешыже огеш шижалт. Марий йылмын тыште мондалт толмыжо изиш кумылым волта.