Кужэҥер район Старсела ялыште шочын-кушшо Яна Полянина йоча жапше годсек мураш-кушташ йӧрата. Тачат усталык паша илышыштыже тӱҥ верым налеш. Тудо Советский посёлкышто йоча сымыктыш школышто хореографлан 11 ий ышта. Тыгак 2024 ий май гыч самырык хореографым директорын туныктымо да воспитатлыме паша шотышто алмаштышыжлан шогалтеныт.
Йошкар кем
Старсела школышто тӱҥалтыш класслаште тунемыж годым Янан аваже верысе клубышто куштымаш кружокым вуйлатен. Ӱдырат тушко уло кумылын коштын.
– Ялысе школ петыралтмек, Советский посёлкыш акам деке илаш кусненам. Тушто йоча усталык пӧртыш куштымаш кружокыш кошташ тӱҥалынам. 9-ше классыште тунеммем годым туныктышем мыйым «Серебрянный башмачок» конкурсыш ямдылаш пижын. Тудо Йошкар-Олаште эртен тушто кок куштымашым ончыкташ кӱлын. Мый, нарынче тувыр ден йошкар кемым чиен, руш калык куштымашым кушташ ямдылалтынам. Репетиций годым чыла движенийым монденам, туныктышем ӧрын, вес преподаватель тудлан каласен: «Тыйын Янат йӧршын куштен огеш сеҥе». А мый кок куштымашымат сайын ончыктенам, кокымшо верым налынам.
Вара Палантай лӱмеш тӱвыра да сымыктыш колледжыш тунемаш пуренам, – шарналта Я.Полянина.
Ӱдыр-рвезе-влак коклаште
Йоча сымыктыш школышто хореографий пӧлкаште 1-8-ше класслаште йоча-шамыч шуаралтыт.
– Отделенийыште чылажге 70 наре ӱдыр-рвезе дене кок хореограф пашам ыштена. Ме нуным предпрофессиональный программе дене шинчымашым пуэна, классический да народно-сценический куштымаш-влакым туныктена. Кызыт мый кокымшо, нылымше, кудымшо да кандашымше класслам туныктем.
Занятийна эре вуйым савымаш дене тӱҥалеш. Вара станок воктене упражненийым ыштена, у материалым тунемына, йоҥылышым тӧрлена. Урок мучаште кажне йочам пашам ыштымыжлан шкаланже совым кыраш туныктенам. Тиде нунылан кумылыштым утларак нӧлта. Занятий годым мый пеҥгыде, дисциплиным кучаш йодшо туныктышо улам гын, урок деч вара ме утларак вольнан, чон почын мутланена. Кажне чырык пытымек, чай йӱмашым эртарена, – палдара хореограф.
Туныктышат — сценыште
Яна тунемшыже-влак дене посёлкышто, районышто, республикыштына эртыше чыла мероприятийыште выступатлат.
– «Корнями в Россию», «Радуга над Кокшагой», «Шанс», «Радуга танца» таҥасымашыш эре ушнаш тыршена. Тыгак республикысе йоча сымыктыш школ-влак коклаште кок ийлан ик гана хореографий отделений коклаште конкурс эрта. Тудо мемнан пашанам тергыме шкешотан отчёт. Ме эре гаяк лауреат, дипломант лийына. Сеҥышыш огына лек гынат, тунемше-влак огыт ойгыро, нунылан кажне выступлений – шкешотан урок. Тӱрлӧ мероприятийыш кудалышташ мыланна тӱвыра пӧлка автобусым пуа.
Тыгак туныктышо-влакат «Сувенир» хор да «Микс» трио дене ме тӱрлӧ пайремыште мурена, – ойла Я.Полянина.
Паша келша
«Самырык еҥлан посёлкышто пашам ышташ неле мо?» йодышлан Яна тыге вашештыш:
– Мый ты пашаш 19 ияш толынам, изи капан уламат, туныктышо семын кузе шындаш, ача-ава, икшыве-влак дене кузе мутланыме шотышто тургыжланенам. Эше мыланем икымше классым туныкташ пуэныт. Палантай лӱмеш тӱвыра да сымыктыш колледжыште, Озаҥыште Тӱвыра да сымыктыш институтышто тунеммылан кӧра мый сай шинчымашым налынам. Тыгак йоча сымыктыш школыштына коллективна сай, эре полшаш ямде. Тидлан кӧра лӱдмӧ эртен. 5-6 ий пашам ыштымеке веле шкалан ӱшанаш тӱҥалынам, шке верыштемак улам манын умыленам.
Самырык специалистлан ятыр надбаке уло, тыгак чыла вере выступатлет гын, пашадарыш оксам ешарен пуат. Лач илыме вер шотышто нелылык лектын кертеш. Но тыштат коммунальный услугылан оксам пӧртылтат. Куандара – отпуск кум тылзе шуйна.
Яна ура чонан, тыршыше, пашаче. Уло моштымашыжым йоча-шамычым шуарыме пашалан пуа.