1 июньышто, Йочам аралыме тӱнямбал кечын, «Кугарня» ден «Ямде лий» газет редакций-влак Йошкар-Оласе Тӱвыра да каныме рӱдӧ паркыште йоча пайремым эртареныт.
Тушко 50 наре икшыве погынен. Йоча-шамычлан марий модыш-влак поснак келшеныт: «Вачым перен», «Ботинкым пӧрдыктымаш», «Пырыс ден коля», «Вараш ден комбиге-влак», «Изи вӱдет йогалеш»… «Эрыкан кайык» сӱрет конкурсышкат ятырын ушненыт. Рвезе-влак утларакшым ӱстел йыр погышо модышым ойырен налыныт. Модыш годым нуным «Кугарня» ден «Ямде лий» газет-влак дене палдарыме. Пайрем гыч кажне гаяк йоча моторешт пӧртылын – чурийышке аквагримым ыштыме. Чулымлыкым ончыктышо-влаклан тамле пӧлекым да сертификатым кучыктымо.
Тӱшкан погынен толшо-влакат лийыныт: Йошкар-Оласе 2-шо да 3-шо номеран школ-влак, «Матур» йот йылме школын тунемшыже-шамыч. Туныктышо-влаклан тауштена!
Иктешлен каласаш гын, пайрем лие. Тиде тӱҥалтыш йӱлашке савырна манын ӱшанена.
