Элыштына йоча туристический кешбэк программе пашам ышташ тӱҥалын. Тидын нерген Марий Эл Республикысе молодёжный политике, спорт да туризм министерстве умылтара.
Тыгай программе почеш икшывым йоча лагерьышке 1 май гыч 30 сентябрь марте колташ лиеш. Ик еш гыч икмыняр йоча да кеч-мыняр сменыште канен кертеш.
Путёвкылан «Мир» карте дене тӱлыман. Тыгодым ик карте дене кеч-мыняр путёвкым налаш лиеш. Да карте ача-аван огылат лийын кертеш. Путёвкылан тӱлымеке, пел акше вич кече жапыште мӧҥгеш картыш пӧртылталтеш, но 20 тӱжем теҥге деч утла огыл.
Кешбэк дене йоча лагерьыште канаш льготан сертификат уло гынат, пайдаланаш лиеш. Тыгодым сертификатыш ешарен тӱлымӧ окса кугыт гыч пелыже пӧртылталтеш, но 20 тӱжем теҥге деч утла огыл.
Программыш кугыжаныш, тыгак коммерческий стационарный лагерь-влак ушнен кертыт. Палаткан, оласе да кечывалым эртарыме лагерь-влак огыт пуро. Ты программыш ушнышо йоча лагерь-влакын спискыштым мирпутешествий.рф сайтыште «Детские лагеря» ужашыште муаш лиеш.
Путёвкым лагерьын сайтше гыч налыда гын, ондак тудын программын участникше улмыжым але укежым тергыза. Туроператорын але агрегаторын сайтше гыч налме годым ойырымо путёвкын программыш пурымыжым тергыман (посна маркировко лийшаш).