Йоча ача-аважым ончышаш!

Ийготыш шушо йоча-влак шоҥго ача-аваштым ончышаш улыт мо?

Марий Эл Республикын прокуратуржо умылтара:

Россий Конституцийын 38-ше статьяжын 3-шо ужашыж дене келшышын, 18 ийым темыше да пашам ыштен кертше йоча-влак пашам ыштен кертдыме ача-аваштым ончышаш улыт. Тидын нергенак каласыме Россий Еш кодексын 87- ше статьяжын 1-ше пунктыштыжо.

Алиментым тӱлымӧ шотышто ойпидыш уке гын, пашам ыштен кертдыме ача-ава-влаклан пашам ыштен кертше йоча-влакым суд гоч тӱлыктат. Алиментын кугытшым палемдыме годым суд ача-аван да кажне йочаштын еш да материальный положенийыштым шотыш налеш.

Но ача-ава жапше годым икшывышт ончылно шке обязанностьыштым шуктен огытыл (алиментым тӱлен огытыл, йочаштым ончен огытыл але йоча дене пырля амал деч посна илен огытыл да молат), да суд тидым пеҥгыдемда гын, йоча пашам ыштен кертдыме ача-авам ончымо деч утаралт кертеш.

Ача-авам ача-ава права деч посна коденыт гын, тунамат йоча алиментым тӱлышаш огыл. Но варарак правам пӧртылтымӧ гын, йоча ача-авам ончышаш.