21 декабрьыште Марий Элым Вуйлатыше Ю.Зайцев Шернур районыш паша дене миен коштмыж годым марий Йӱштӧ Кугызан илыме верыштыже лийын.
Тушко республик гыч веле огыл, Российын вес регионжо, тыгак йотэл гычат турист-шамыч толыт. Теле мучко Йӱштӧ Кугызан пӧртыштыжӧ вич тӱжем наре еҥ лиеш. Ты верым Марий Элын туристический индустрийын объектше-влак реестрыш пуртымо.
Ю.Зайцев резиденцийыште, у полатыште лийын да тудын республикын этнотӱвыражым, калык да конфессий-влак кокласе кылым вияҥдаш полшымыжым палемден. Вуйлатыше тыгак «Шонымашым шуктышо кож» акцийыш ушнышо Настя Элембаевалан коньки ден шере пӧлекым кучыктен.