У ий – эн йӧратыме, поро, йомаклан ӱшанаш таратыше пайрем. Тудым изижат-кугужат кажне суртышто вучат. Но эн чот – йоча-влак. Нуно ӱшанат: ты пайрем годым йомакысе семын юзо вий озалана, шонен пыштыме шукталтеш.
Садланак йочасадыштына У ий пайремлан поснак ямдылалтыт. Тысе пашаеҥ-влак веле огыл, ӱдыр-рвезе-шамычын ача-аваштат ямдылалтме пашашке чолган ушнат. Йоча-влак пайрем мероприятийлан моторын сӧрастарыме залыш толыт, нуным тӱрлӧ тӱс дене чолгыжшо У ий кож вашлиеш. Йӱштӧ Кугыза ден Лумӱдыр, йомакысе персонаж-влак нунын кумылыштым нӧлтат, пӧлекым кучыктат.
Утренник-влак икте почеш весе эртаралтыт. Нуно йочан шӱм-чонжым куан да пиал дене темат. Ик жаплан тудым юзо йомак тӱняш вӱден наҥгаят. Пайрем годым йоча-шамыч шкежат уло кумылын мурат-куштат, почеламутым сылнын лудыт, конкурслашке ушнат. А эн тӱҥжӧ – Йӱштӧ Кугыза нунылан пӧлекым кучыкта да пайрем кумылым пӧлекла!
А.Сергеева. Йошкар-Оласе 61-ше номеран «Теремок» йочасадын воспитательже.