Физкультур – мыйын йӧратыме урокем. Тудым О.В.Иванов туныкта.
Олег Васильевич – поро кумылан, пеҥгыдын йодын моштышо педагог. Тудо, Н.К.Крупская лӱмеш Марий пединститутым 1988 ийыште тунем лекмек, вигак Сотнур кыдалаш школыш пашаш толын. Ончыч пионервожатыйлан ыштен, варажым военрук, урок деч вара кодмо группышто воспитатель лийын. Кызыт физкультурым да ОБЖ-м туныкта. Сотнур школышто 32- шо ий тырша.
Телым ме ече дене коштына, таҥасымашлаште чӱчкыдын вийнам тергена. Лум вочмек, вигак ечыгорныш лектына. Классыштына тале ечызе ятыр. Тиде – Станислав Петров, Иван Александров, Руслан да Максим Александровмыт, Всеволод Дмитриев, Анастасия Артемьева.
Шошым да кеҥежым ме стадионышто шкенан ГТО значокым налаш нормативым сдатлаш ямдылалтына. Куржталына, кӱкшытыш тӧрштылына. Футболла, волейболла, баскетболла модына. Йолташем-влаклан О.В.Ивановын эртарыме урокшо пеш келша.
Мый физкультурым, спортым пеш йӧратем. Йӧратыза теат тиде кӱлешан урокым, спорт дене пеҥгыде кылым кучыза. Вет тудо уш-акылым пеҥгыдемда, вий-куатым ешара, кумылым нӧлта, вияным ышта.
Виктория БАРАНОВА.
Волжский район, Сотнур школ.