«Шойбулакский» племзавод АО республикыштына ик эн виян озанлыклан шотлалтеш. Август кыдалне тудын пашаеҥже, тракторист Евгений Леонидович Скобелевым Президент В.Путин «Россий Федерацийысе ялозанлыкын сулло пашаеҥже» чаплӱм дене палемден.
Евгений Леонидовичым ты кӱкшӧ награде дене ялозанлыкыште тыршыше-влакын профессионал пайремыштым палемдыме годым торжественно саламлат. Тудым кажне ийын октябрьын кокымшо рушарнянже пайремлат. Тений ты пайрем 8 октябрьыште лиеш.
Е.Скобелев дене палыме лияш манын, Медведево районысо Ошламучаш ял воктенысе пасушко лӱмын мийышна. Тудо Шойбулакысе озанлыкын мландыжлан шотлалтеш, тӧр верыште верланен. Тушто тракторист пасушко тыгыдемдыме известка ложашым шавен. Паша кокла гычак мутланаш логале, вет тудо кажне кечын манме гаяк пасу пашаште «шолеш».
Ошламучаш пасушто
Тений сентябрь тӱҥалтыш шокшо да ояр игечыж дене куандара. Пасуштат паша шке радамже дене шукталтеш. Кас могырыш тайныше чевер кечын ӱмылкаштыже, трактор почеш пурак кӱшкӧ нӧлталтеш. Чодыра тӱр воктеч мемнан велке «John Deer» трактор (Америкыште ыштыме, Китайыште погымо) лишемеш. Тудым Евгений Скобелев виктара. Трактор омса почылтмеке, яндар шинчаончалтышан, весела кумылан, шыргыжше тракторист мемнан дене саламлалте. Межат ты вашлиймашлан моткоч йывыртенна, вет кажне кечын элнан сулло пашаеҥже дене от вашлий.
Изинек техникылан шӱман
Е.Скобелев Медведево район Курыкнур ялыште шочын-кушкын. Шочмо ялыштыжак ешыж дене ила. Тракторист изинек техникылан шӱман кушкын. Тудын ойлымыж почеш, «шеч кутыш» улмыж годымак ачаж пелен шӱдырнен. Ачаж ден аваже совхоз пашаште тыршеныт. Ачаже Леонид Михайлович механизатор, аваже доярке лийыныт.
Шойбулак селасе школышто лу классым пытарымеке, Е.Скобелев вигак колхоз пашашке толын. Школышто тунеммыж годымак правам налын. Идалык наре ыштымеке, армийыш каен. Кум ий гыч мӧҥгеш пӧртылын да тачысе кече мартеат тыштак тырша. Тудо «Шойбулак» озанлыкын чапшым кумло утла ий нӧлта.
Моктен ойлымым колмеке, изиш ӧрмалгыш, вожылмыжат шижалте. Но вет ты ой дене келшыдежат огеш лий. Очыни, шке пашам йӧратыше да чон пыштен тыршыше еҥ веле ик верыште ятыр ий дене ышта.
Икымше трактор
Евгений Леонидович деч икымше тракторжо, паша кечыже, тыгак ончычсо ден кызытсе пашан ойыртемже нерген йодыштым. Тудо тыгерак радамлыш:
– Озанлыкыш толмеке мыланем савар воктене шогышо шӱкшӧ тракторым ӱшанышт. Тиде МТЗ-82 ыле. Южгунамже, ик кечым ыштенам гын, кум кечым олмыкташ логалын. Ачам пелен изинек коштын, техникымат олмыкташ тунемынам. Тидын шотышто йӧндымылыкым шижын омыл, садлан ачамлан эреак тауштем.
Илыш ончыко кайыме дене пашам ыштыме условият ятырлан саемын. Ме тракторист-шамыч, кеҥежым шукыжым пасушто эртарена: куралына, ӱдена, тӱредына, шийына да моло сомылымат шуктена. Ожно шокшо кече годым трактор кабине омсам почын пашам ыштенна. Шинчашке, шодышко мыняр пурак пурен… Телым, йӱштӧ витарен. Кызытсе техникыште кеҥежым кондиционер дене пайдаланаш, телым шокшо юж дене ырыкташ йӧн уло. Икманаш, пашам ынет ыште гынат, ышташ лиеш. Но мыланем тӱҥжӧ условий огыл, а пашажак келша.
Шошо гыч теле марте
Трактористын пашаже апрель мучаште тӱҥалеш да лум толмеш шуйна. Тысе озанлыкыште шӱдӧ наре трактор уло. Кажныже могай-гынат сомылым шукта. Е.Скобелевын тӱҥ пашажлан мландым ӱяҥдымаш шотлалтеш. Тыгак олымым рулоныш пӱтыра, шудо тюкым ямдыла. Телымат паша ситышын, манеш. У тургымлан техникым ямдылыман, иктаж-мо шаланен гын, тудым ачалыман. Тыште кажне пашаеҥ шке техникыжлан мутым куча. Евгений Леонидовичын технике дене пуйто «шкешотан» кылже уло. Тудо шкенан элыштына але йотэлыште ыштыме техникымат тӧрлен мошта.
– Мыйын кажне кече ик семын эрта манаш лиеш. Эрдене пасушто улам, кастене – мӧҥгыштӧ. Телым кок кече канышем лиеш, тыгак отпускыш лекшаш улам. Илышлан ӧпкелымаш уке, мыланем чылажат келша, – мане тудо.
Евгений Леонидович деч пашаште могай нелылык дене чӱчкыдын тӱкнымӧ амалымат умылаш тыршышым. Тудо ты йодышлан шыргыжале веле. Тидыже Е.Скобелевын чонлан келшыше верыште улмыж нерген ойла. Тудлан кажне паша кече куаным конда. А тыгай годым сай ден уда нерген шонкалаш жап йӧршынат уке.
Очыни, тыгай пашаеҥ-влаклан кӧра элна вияҥеш да ончыко кая. Таклан огыл Евгений Скобелев пашажлан кӱкшын аклалтын да «РФ ялозанлыкын сулло пашаеҥже» лӱм дене палемдалтыне. Меат Евгений Леонидович Скобелевым чаплӱм дене шокшын саламлена да чыла сайым гына тыланена!
И.Речкинын фотожо-влак.