С.Г.Чавайн лӱмеш Калыкле книгагудо Марий Эл Республикын Тӱвыра, печать да калык-влакын пашашт шотышто министерствыжын полшымыж дене «Йӧратыме книгагудетлан у книгам пӧлекле» республикысе акцийым увертара.
Акцийышке лудаш кумылан, книгам аклыше, книгагудым йӧратыше-влакым ушнаш ӱжына. А кӧ кызыт марте книгагудышто лийын огыл – тугеже тиде акций шергакан пӧлек дене ты тӧнежыш вашкаш амалым ышта.
Акцийым эртарыме келшык (условий):
книга у лийшаш;
книга яра налалтеш;
кунар кертыда, тунар книгам пӧлеклыза;
пӧлеклыме книга-влак мӧҥгеш огыт пӧртылталт.
Книгам пӧлеклаш шонышо-влак республикын кеч-могай библиотекыжлан пӧлекым ыштен кертыт.
Акций 14 февральыште, Тӱнямбалысе книгам пӧлеклыме кечын, иктешлалтеш. Тиде пайремым 2012 ий годсек палемдат.
Калыкле книгагудышто Пӧлеклышын кечыже пайремлалтеш. Акцийышке чулымын ушнышо-влак С.Г.Чавайн лӱмеш Калыкле книгагудын тауштымашан серышыж дене палемдалтыт. Нунын лӱмышт «Книгагудылан пӧлеклыше-влак» книгаш пурталтыт, тыгак ойыртемалтше-влак нерген книгагудын сайтыштыже палдарат.
Эльвира Терентьева.